OFWs nga gikan Libya giawhag sa pag-apil sa mega jobs fair

By: Juju S. Manubag

Cebu City, 28 March (PIA)---Mga Cebuano nga overseas Filipino workers (OFWs) nga nawad-an ug mga trabaho tungod sa pugsanong pag-uli sa nasod tali sa kagubot sa Libya ug katalagman nga miagom sa Japan mahimo nga makahimulos sa ipahigayon nga kinadak-an nga mega jobs fair  nga buhaton karong Abril nga gipaluyohan sa dakbayan sa Sugbo.

Ang hepe sa Department of Manpower and Placement Services (DMPS) sa Sugbo, nga si Fidel Magno nagkanayon nga may kapin dos mil (2,000) ka mga trabaho alang sa nagpangita ug trabaho karong Abril 14, ang kinadak-an nga job fair nga ipahigayon ang kagamhanan sa Sugbo.

         

Ang job fair sunod bulan mao ang ika-55 nga ipahigayon sa dakbayan sukad Enero karong tuiga, matod ni Magno.

Adunay saysenta y singko (65) ka mga kumpanya nga moapil sa giingon nga mega jobs fair.

Ang regional director sa Philippine Overseas Employment Administration (POEA) nga si Evelia Durat nagkanayon nga ang mega jobs fair sa Abril 14 usa kini ka dakong tabang alang ngadto sa mga OFWs nga mipauli gikan sa Libya nga walay panginabuhian diri sa Sugbo.

Si Durato nagkanayon nga kadtong mga OFWs nga na-trauma sa ilang nasinati nga kagubot sama didto sa Libya ug wala na mangandoy nga mobalik ug trabaho sa gawas mahimong makakita ug trabahong local ug mahiduol sa pamilya.

Adunay mga posisyon nga abli apil ang alang sa mga skilled sa welding, mga mekaniko, foreman, propesyonal sama sa nars, sales manager, ug aduna usab food servers nga gikinahanglan.

Si Magno nagkanayon nga gihatagan nila ug priyoridad kadtong mga displaced OFWs gikan ug Libya samtang ang ilang pagbansay sa gawas sa nasod may bintaha nga madawat sa trabaho.

Si Durato nag-ingon nga kadtong mga OFWs nga gusto gihapon motrabaho sa gawas tungod sa dagko ilang kita didto mahimo nga iduso nila sa ahensiya nga akredito sa POEA. (PIA-Cebu/JSM) 

 ============

DOH-7 mangampanya sa mga kabayan ug magbakuna batok tipdas sa 1.4M nga mga bata dinhi sa CV

By: Juju S. Manubag

Cebu City, March 26 (PIA) --- Ang Department of Health (DOH-7) sa Central Visayas mopahimutang ug usa sa halapad nga pagpangampanya ug pangbakuna batok tipdas ngadto sa uno punto kwatro milyones (1.4M) nga mga bata ug sa tanang kabalayan dinhi sa rehiyon.

DOH-7 Measles-Rubella campaign point person, Dr. Nayda Bautista mipahibalo nga ang pagpangampanya ug pangbakuna sulod lamang kini sa usa ka bulan nga pagasugdan karong Abril 4 hangtud Mayo 4 ngadto sa tanang kabalayan sa tibuok nasud ug sa  katorse milyones (14M) nga mga bata nga nag-edad ug otso anyos.

Siyento kwarenta mil (140,000) ka mga bakuna alang sa tipdas ang gigahin dnhi sa rehiyon ug kini miabot na, matod pa ni Bautista.

Andam na usab ang tanang preparasyon alang niining kabalayan nga pagpang-kampanya sa bakuna batok tipdas tungod kay ang mga kagamhanang lokal misuporta man niini pinaagi sa paghatag ug sakyanan alang niadtong mopahigayon sa pagbakuna, sumala ni Bautista.

Dugang pa ni Bautista nga ang usa ka bakuna may napulo (10) ka mga doses ug gibana-bana nga mokantidad kini ug P95 ang kada dose sa bakuna.

Ang sakit nga tipdas usa ka makatakod nga sakit nga makuha pinaagi sa pagpangatsi, ubo ug laway.

Sagad sa matakboyan sa tipdas magpula ang panit, mangatol, hilantan nga modagan sa 3 ka adlaw ug sobra pa, gi-ubo o kaha gisip-on.

Ang bata nga nag-edad ug 1 ngadto sa 4 ka tuig mao ang sagad dali nga matakdan niini.

Pero kay makatakod lagi ang tipdas, walay edad nga pilion ang matakdan niini kay adunay mga kaso sa miaging tuig nga ang gipang-tipdas nag-edad na ug sobra 20 anyos, ingon ni Bautista.

   

Hinoon, ni Bautista pa, nga karong tuiga mikunhod ang gipang-tipdas sa rehiyon ikumparar sa milabay nga tuig sa maong mga bulan sa Enero hangtod tunga sa Marso diin adunay 10 ka mga kaso sa gipang-tipdas ug karon 7 na lang.

         

Sa laing bahin, si Bautista nagkanayon nga may mga kaso nga bisan nabakunahan na, matakdan lang gihapon sa tipdas.

Kini kuno ni Bautista pa nga mga bakuna sa tipdas may otsenta y singko porsiyento (85%) nga epektibo kay ang nabiling kinse porsiyento (15%) mi-resulta sa palpak o failure.

Ang DOH mi-triple sa paningkamot sa tinguha nga wala nay mga kabataan nga takboyan sa makatakod nga sakit sa tipdas.

Ang ubang rehiyon sa nasod mideklarar na ug outbreak sa mao nga sakit, busa pangingkamutan sa DOH-7 nga dili kini mahitabo dinhi sa Central Visayas, ni Bautista pa. (PIA-Cebu/JSM)

============

Cebuano News:  P120 milyones gitagana sa pag aspalto sa kadalanan sa Sugbo

By: Hazel F. Gloria

Cebu City, March 28 (PIA)—Mikabat sa P120 ka milyones ang naaprobahan nga pondo niadtong biyernes, Marso 26 alang sa pag-aspalto sa nagkalain-laing dalan sa siyudad sa Sugbo.

Ang maong pondo gibahin-bahin sa nga barangay nga kinahanglan nga aspaltohon ang mga kadalanan.

Ang P29.60 ka milyones gitagana sa Tagunol, B. Aranas, T. Villa, Tres de Abril, Lakandula, A. Lopez, Punta og A. Bores nga naa nahimotang sa barangay Kinasang-an og Cogon.

Ingon man usab sa barangay Mambaling, San Nicolas Proper, Pahina San Nicolas, Calamba, Punta og Suba.

Lain usab nga pondo nga mikabat ug P23. 39 ka milyones ang gitagana sa M. Aznar, J. Urgello, Tres Borces, S. Cabahug, Panagdait, Holyname, Bonifacio og Zulueta.

Ang P26. 22 ka milyon alang usab sa pag-aspalto sa V. Gullas, F. Gonzales, F. Calderon, Panganiban, Pelaez og Junquera nga nahimotang sa barangay San Roque, Sto. Nino, Ermita, Pahina Central, Kamagayan, San Antonio og Sta. Cruz.

Ang laing pondo nga  P20.79 milyon gitagana usab sa kadalanan diha sa barangay Apas, Talamban, Bacayan og Pit-os.

Ang paghimo og drainage system gikan sa J. Urgello, Alcantara og Leon Kilat Streets sa barangay Sambag I  adunay budget nga P8.69 milyones.

Ang maong mga pondo gipreparar sa buhatan sa Department of Engineering and Public Works (DEPW) niadtong Pebrero para sa maong mga programa. (PIA-7/HFG)