Malampuson ang paglusad sa I-Rice dinhi sa Sugbo

By : Juju S. Manubag

 Cebu City, 17 March (PIA) – Kapin sa usa ka gatos ka mga tawo nagtigom kagahapon sa Centennial Warehouse sa National Food Authority (NFA)-7 alang sa re-launching sa Iron Fortified Rice or I-Rice dinhi sa Sugbo aron mohatag ug supporta sa pagtawag sa kagamahanan nga masolusyonan ang kakulang sa sustansiya.

 Si NFA-7 regional director Atty. Danilo Bonabon nagkanayon nga usa sa pinakamaayong paagi nga nakit-an sa kagamhanan nga masolusyonan ang kakulangan sa “iron” sa mga Pilipino mao ang pagkaon ug iron fortified nga bugas.

 Ang I-Rice gimando ubos sa Akta Republika 8976 o Philippine Food Fortification Act 2000 nga pahingusgan ang mga nag-unang mga pagkaon sama sa bugas, harina, asukar ug mantika nga malangkapan sa mga kulang nga bitamina nga makapahimsog. 

Ang bitamina A, iron ug iodine mao ang mga gikinahanglan para sa salabutonon ug panglawas nga kahimsog.

Matod pa ni Bonabon nga ang Pilino nga gradwado karon ubos o inferior ikumpara sa gradwado sa silingang mga nasod ug usa sa mga hinungdan niini mao ang kawad-on.

Kadaghanan kanatong Pilipino dili makapalit sa pagkaong kumpleto sa nutrisyon alang sa atong kabataan mao nang apektado ang pangutok ug panglawas, nagkanayon si Bonabon.

 Matod usab ni Bonabon nga ang I-Rice nalusad na niadtong  2004 apan wala kini magmalampuson tungod kay mas ganahan man ang mga Pilipino ug bugas nga puti.

“Ang iron fortified nga bugas ug maluto adunay kausaban sa kolor pero walay kausaban sa lami. Apan mo-risgo ba diay kita sa pagpa-usbaw sa pangutok sa atong kabataan tungod lang dili puti ang kan-on?” sumala ni Bonabon

Ang mahinungdanon nga nasolusyonan ug na-remedyohan ang problema sa kakulang sa iron sa nasod kay mahatag ni sa gobyerno sa ubos nga presyo nga P27 ang kilo sa I-rice, dugang pa ni Bonabon.

Gawas sa Cebu, ang laing tulo ka probinsiya sa Central Visayas nga ang Bohol, Negros Oriental and Siquijor nagdumala usab ug susamang re-launching sa I-rice nga gipahigayon sa tanang opisina sa NFA sa samang oras ug adlaw tibuok nasod.

Ang mga miapil niini naglangkob sa mga representante gikan sa kagamhanan local ug nasyonal, opisyales ug mga miyembro sa Grains Retailers Association of the Phil., Inc. (GRECON) - Cebu nga mipirma usab sa deklarasyon sa ilang pasalig sa pagsuporta ngadto sa programa sa I-Rice.

Ang I-rice gidalit sa NFA-7 sa dihang pagpangaon ug paniudto ug sa pamaligya sa kinilo nga putos. (PIA-7/JSM)