DENR gipanghingusgan ang pagpahiuli sa gubang kalikupan

by Rizalie Anding Calibo

Province of Siquijor, March 11 (PIA) – Gitagaan karon ug dakong pagtagad sa buhatang lokal sa Department of Environment and Natural Resources(DENR) sa lalawigan sa Siquijor ang pagpahiuli sa kalikupan ilabi na sa kadagatan ug sa mga dapit diin adunay suba ug mga kasapaan.

Matud ni Rowena Magpiong, Information Officer sa DENR, gipunting sa buhatan karon ang ilang mga lakang ngadto sa pagpahiuli sa mga nagubang kalikupan sa lalawigan pinaagi sa Integrated Coastal Resource Management Program (ICRMP).

Usa niini, sumala pa, mao ang pagpananom ug mga bakhawan (mangroves) sa kadagatan ingon man pagpananom sa nagkadaiyang klase sa kahoy daplin sa kasapaan ug kasubaan.

Dili pa lamang dugay ang buhatan ubos mangrove rehabilitation contract  sa ICRMP mipasiugda ug mangrove planting sa barangay Lomangcapan ug Tulapos kansa giila nga protected marine sanctuaries ug target barangays sa lungsod sa Enrique Villanueva (Talingting) sa  ICRMP.

Sa kasamtangan ug atol sa selebrasyon sa Women’s Month sa Marso ang buhatan, pinaagi sa mga empleyadong kababayen-an mihimo ug bagging/potting alang sa dugang pang mga binhi nga magamit alang sa dinaghang pagpananom ug kahoy kon “massive tree planting.” 

Sumala  pa, adunay nagkalain-laing binhi nga ipanghatag libre ang buhatan niadtong buot mananom. Giawhag lamang ang mga interesadong katawhan o grupo sa pagdala ug kopya sa titulo sa yuta nga ilang pagatamnan.

Kining mga binhi nahimutang sa ilang tulo ka mga nurseries sa DENR office ug sa ICRMP sa Guiwanon ug Cangmalalag, Larena, Siquijor. (PIA-Siquijor/PIA-7)

Mayor, polis miawhag sa mga Siquijodnon sa  pagkamabinantayon  

 Province  of Siquijor, March 11 (PIA7)—Miawhag ang Mayor sa lungsod sa Maria, Mayor Rebecca Padayhag uban sa mga kapulisan sa pagkamabinantayon human mikuyanap ang taho nga adunay kidnap nga nahitabo sa lungsod sa Maria, Siquijor.

Hinuon gipanghimakak sa mga tinugyanan sa kapulisan sa probinsya ilabi na sa Maria Police Station ang maong “kidnap rumor” nga kini usa lamang ka hulga nga gipakuyanap pinaagi sa “text messages” aron paghatag ug kakurat sa mga Siquijodnon.

Ang maong “text rumor” mahitungod sa kabataan nga gikidnap kunohay sa lungsod sa Maria ug nna sila gikuhaan ug parte sa kalawasan, mikuyanap human sa natahong balita sa siyudad sa Cebu kabahin sa usa ka estudyante nga gikatahong gikidnap ug gipatay .

Sumala sa kapulisan sa Maria ang maong “text scare” nga mikuyanap sama sa nagdilaab nga kalayo sa tibuok sa isla dili tinuod ug klaro nga gihimo lamang aron paghatag ug kakuyaw.

“Walay bisan usa nga mianhi sa among opisina nga mitahong nawad-an siya ug anak o gipatay ba hinuon,” matud pa sa usa ka polis.     

Dugang pa niya nga ang ilang ginsakpan misuroy sa tibuok lungsod aron pagsuta sa mga makadudang estranghero bisan pa nga ang mga turistang misulod sa isla giayo na ug “monitor”.

Sumala pa usab sa kapulisan dili makalingaw ang maong  text rumor busa miawhag sila nga kon ugaling adunay susamang text messages, dili kini angay tuhuan dayon hinuon, giawhag sa pagreport dayon sa kapulisan.

 “Ayaw kini iforward dayon aron maputol ang maong ”scare chain,” dugang pa sa mga pulis.

Sa laing bahin, giangkon sa kapulisan nga ang maong text rumor makaghat usab sa katawhan sa pagkamabinantayon busa ilang gihangyo ang suporta niini sa ilang paningkamot pagsugpo sa mga kidnapping ug uban pang klase sa krimen.

“Kinahanglan gayud kitang magmabinantayon ug magmaabtikon sa pagtabang sa mga kalihukan pagsugpo sa dautang buhat sa atong isla,” sumala pa usab ni Mayor Padayhag.

Iya usab giawhag ang kapulisan sa paghimo ug mga lakang paglikay sa mga dautang tawo nga mohatag ug dili maayong binuhatan sa Siquijor sama sa kidnapping. (PIA Siquijor/from the report of Eda Lou Manigo/TSM)