Ika-100 nga kasumaran sa International Women's Day  saulogon karong adlawa

By: Juju S. Manubag

CEBU CITY, March 8 (PIA) – Saulogon karong adlawa, Marso 8 ang ika-100 nga kasumaran sa International Women's Day.

Niining maong selebrasyon ang Cebu Provincial Women’s Commission mopahigayon ug Medical ug Dental Mission ngadto sa Cordova, Cebu karong adlawa, kini gipakasayod ni Dr. Manuel Purog sa Provincial Helath Officer, ang Coordinator alang niining outreach project.

Karong buntag magsugod ang Medical ug Dental Mission sa Cordova ug adto kini pagabuhaton sa Senior Citizen’s Bldg., nga anaa mahimutang sa luyong dapit sa Cordova Municipal Hall, sumala ni Dr. Purog.

Nagkanayon usab si Dr. Purog, ang mga serbisyo nga ilang ihatag karong adlawa  mao ang mga mosunod: Cholesterol, sugar, medical ug dental consultations alang sa tanang edad, chest x-ray, BMI ug papsmear.

Matod usab ni Purog nga ang magpakuha ug sugar karong adlawa, magpuasa ra ug duha ka oras.

Nagpahinumdom si Dr. Purog nga 1^st come, 1^st serve basis ang nilang buhaton sa Medical ug Dental Mission kay i-agad ra sa ilang dalhon nga mga tambal.

Samtang ang pap smear test adto lamang sa mga babayeng nagpangedaron ug byente singko anyos (25) ngadto sa singkwenta y singko anyos (55). 

Kini buhaton ngadto sa Rural Health Unit (RHU) Health Center sa Cordova ug buntag lamang kini, miingon si Purog.

Ang Dental Mission nila alang ra kini sa pagpangibot sa ngipon ug konsulta. Walay pasta nga pagabuhaton matod pa ni Purog.

Nagpahibalo usab si Purog nga karong Marso 17 ang ilang grupo maghimo sa samang Mental ug Dental Mission adto sa Talisay City Hall. (PIA-7/jsm)