Walay OFW nga drug mule sa Central Visayas

By: Juju S. Manubag

Cebu City, Mar 04 (PIA) --- Walay nadokumento nga overseas Filipino worker (OFW) nga nahimong drug mule diri sa Central Visayas matod pa sa Philippine Overseas Employment Agency (POEA)-7 Regional Director Evelyn Durato sa gipahigayon nga espesyal Kapihan sa PIA niadtong Miyerkules.

Gikupirma usab kini sa Philippine Drug Enforcement Agency (PDEA)-7 Regional Director Adrian Alvariño.

Matod ni Alvariño nga kasagaran ngadto ra sa Northern Luzon nga taas ang mga insidente sa pagpayuhot sa ginadiling druga pinaagi sa sa mga mouli nga mga OFWs.

Sumala ni Durato nga anaa sa module nga ginapahigayon nga pre-departure orientation seminar ngadto sa mga manglarga nga mga OFWs.

Pasidan-an gayud nila nga eksaminon ang unsay ipadala kanila ug sa dili pagtugot sa ilang kaugalingon nga himoong courier sa mga sindikato sa druga.

Dugang pa ni Durato nga ang ginapahigayon nila na mga seminar dili lamang nganha sa pre-departure area kung dili ngadto usab sa mga mogradwar karong tuiga nga nagplano nga manarbaho sa gawas.

Miingon si Durato nga nag-reach out usab ilang buhatan ngadto sa mga kabarangayan alang sa pag-edukar sa mga local nga lumolopyo.

Tinguha sa POEA nga ang katawhan mahalikay nga mabiktima sa illegal recruiters ug masayod sa ilang katungod sa dili pa sila makagawas ug nag-apply pa sa gawas sa nasod.

Si Durato mihatag sa kasinatian sa ilang buhatan hilabina kung ang giluwas nilang biktima magdumili sa pagpanumpa, sa pagpatino ug pagpasaka ug kaso ngadto sa nagpaputa nila nga agalon nga ni Durato pa maoy labing makakaguol nga parte diha sa ilang buhatan.

Ni Durato pa, kining mga illegal recruiters mga good talkers busa gipahimangnoan niya ang publiko sa dili pagpakabuta sa ipanghagad nga trabaho ug pagpaka-over excited sa isaad nga suholan ngadto sa gawas sa nasod.

Gibalik-balik pag-ingon ni Durato nga susihon sa makadaghan nga ang nag-recruit nila usa ka lehitimo ug rehistrado nga ahensiya sa POEA.

Si Durato sa pagpanapos mihatag ug update kabahin sa pagpadala ug trabahante alang sa mga nasod nga Yemen , Libya ug Bahrain sa Middle East nga niya pa gisuspenso pa kini karon hangtod makab-ot na ang kalinaw sa nahisgutang mga nasod. (PIA-7/JSM)