Ginadili na ang mananabang nga magpa-anak diha sa balay

By: Juju S. Manubag

Cebu City , March 29 (PIA) --- Ginadili na ang pagpa-anak sa balay nga ang magpaanak usa ka mananabang, matod pa sa DOH-7 Family Planning Coordinator Dr. Lutgarda Herbias sa pahinabi niini sa PIA.

Sumala ni Herbias, ang mao nga pamahayag niya gisuportahan kini ug tulo (3) ka mga ordinansa na gimugna ang probinsiya sa Sugbo nga sinulat sa provincial board members nga sila Juan Bolo, Victor Maambong,  Agnes Magpale ug  Peter John Calderon.

Anaa usab kini sa usa ka advisory nga giluwatan  sa Department of Health (DOH)-7 regional director Dr. Susana Madarietta; ug Administrative Order No.2008-20029 nga hinimo ni kanhing DOH Secretary Francisco Duque,.

Tungod niini, ang Maternal Child Health section Maternal Newborn, Child Health and Nutrition (MNCHN) sa DOH-7 nagpahigayon ug onse (11) ka adlaw nga pagbansay-bansay alang sa basic emergency obstetric and newborn care (Bemonc) alang sa mga doktors, nars ug midwives, pakisayod ni Herbias.

Dugang ni Herbias, ang onse (11) ka adlaw nga pagbansay-bansay sa Bermonc bukas alang lamang sa mga interesadong doctor, nars ug midwife nga nagmugna ug usa ka team.

Sukad sa tuig 2005, 17 na ka mga batches ang nabansay sa Bemonc. Gani ang awahing tulo ka batches gikan pa sa rehiyon 8 tungod kay ang Sugbo lang sa tibuok rehiyon sa Visayas ang adunay pasilidad sa Bemonc nga anha sa Vicente Sotto Memorial Center (VSMC) ginapahigayon, sumala ni Herbias.

Si Herbias nagpahibalo usab niadtong interesado nga mo-apil sa pagbansay-bansay sa Bemonc nga magpadala lamang ug letter of intent sa ilang buhatan sa DOH ug kinahanglan ang team may doktor, nars ug midwife.

Ubos sa United Nations’ Millennium Development Goals (MDGs), angPilipinas misuporta nga kunhoran ang maternal and infant deaths sa tuig 2015 ngadto sa singkwenta y dos (52) sa kada usa ka gatos ka libo nga manganak ug nagdto sa 19 nga masuso sa kada usa ka libo nga mahimugso.

Si Herbias nagkanayon nga ang pagkunhod sa maternal deaths usa ka ‘tall order’ tungod kay ang tala sa nasod pagka-karon sa maternal mortality rate adunay 162 nga namatay sa kada usa ka gatos ka libo (100,000) nga gihimugso.

Dugang ni Herbias, ang pagkunhod sa infant mortality rate mas makab-ot pa tungod ang tala sa nasod pagka-karon adunay 31 nga mamatay sa kada usa ka libo (1,000) nga ihimugso.

Sa Central Visayas, ang infant mortality rate anaa sa 29 ngadto sa 30 sa kada usa ka libo (1,000) nga ihimugso matod pa sa opisyal sa DOH-7.(PIA-Cebu/JSM)