Cebuano news: Trinidad, Alicia LGUs susamang nakadawat og 3 ka nutri-awards

By Rey Anthony H. Chiu

TAGBILARAN CITY, Bohol, Feb. 12 (PIA) --Parehas nga miuli bitbit ang tulo ka mga pasidungog gikan sa Provincial Nutrition Council (PNC) Awards Pebrero 7 didto sa JJs Seafoods, ang mga taga Trinidad ug Alicia. 

Parehas usab ang Trinidad ug Alicia nga nasulod sa Top 10 Outstanding Municipal Nutrition Councils (MNC) sa 43 ka kalungsurang miapil sa indigay sa 2012, segun sa natala nga taho sa team leader sa PNC evaluation team nga milibot sa kabarangayan sa Bohol. 

Sa duha usab ka distrito nga ilang gi-representahan, parehas usab nga midaug. 

Ang Guinobatan sa Trinidad ug ang Cayacay sa Alicia midaug sa Outstanding Barangay Nutrition Council (BNC) sa Ika duha ug ika tulong distrito. 

Sa unang Distrito, midaug ang Barangay Candavid sa Maribojoc alang sa Outstanding BNC. 

Parehas usab ang duha ka lungsod nga nakasakmit sa duha sa tulo ka Outstanding Purok kinsa nakapakita sa mga maayong programa batok sa malnutrisyon. 

Ang Purok 3, sa Poblacion Alicia ug ang Purok 3 sa Kinan-oan Trinidad maoy duha sa tulo ka purok sa tibuok Bohol nga midaug. 

Uban kanila ang Purok 4 sa Katarungan Ubay. 

Midaug ang mga Municipal Nutrition Programs sa mga lungsod sa Jagna, Garcia-Hernandez, Ubay, San Miguel, Trinidad, Alicia, Corella, Sikatuna, Balilihan ug Candijay sa Top Ten Outstanding MNCs. 

Ang lungsod sa Tubigon usab ning tuig nagpadayon sa paghupot sa Consistent Regional Outstanding Winner for Nutrition (CRoWN). Kini maoy ika duha nga pagcomply sa lungsod sa bangga. 

Gawas niini, taga Tubigon usab nga si Maria Cristina Renoblas kinsa taga Buenos Aires sa samang lungsod ang midaug sa Provincial Outstanding Barangay Nutrition Scholar. 

Karong tuiga, ang lungsod sa Talibon, Inabanga ug Loon ang mga Nutrition Honor Maintenance Awardees. (FCR/RAHC/PIA Bohol)