By Elvira C. Bongosia
TAGBILARAN CITY, Bohol, Feb. 7 (PIA)
--Mismong si Presidente Benigno "Noynoy" Aquino III ug Moro Islamic
Liberation Front (MILF) chairman Al Haj Murad ang molusad sa Lunes, Pebrero 11
sa "Sajahatra Bangsamoro" sa mismong compound sa Bangsamoro
Leadership and Management Institute (BLMI) sa Sultan Kudarat.
Sa usa ka press briefing sa Malakanyang, gibutyag ni Cabinet Sec. Jose Rene
Almendras nga kini ang labing unang higayon nga mobisita sa kampo sa MILF sa
Maguindanao ang Presidente sa Pilipinas.
Ang "Sajahatra" gikan sa pinulongang Arabic-Bahasa-Melayu nga
nangahulugan og "blessing, prosperity and peace" mao nga eksakto
kining panagtagbo sa gobyerno ug MILF.
Matud pa ni Almedras, kini ang kongkretong socio-economic peace initiative nga
nagtinguhang mamaayo ang kahimsog, panginabuhian ug edukasyon sa mga naa sa
MILF communities.
Giingong kini ang pagmatuod sa pagsalig ug kumpiyansa sa duha ka bahig sa matag
usa ug pagpalig-on sa ilang relasyon alang sa kalinaw ug paglambo sa
Bangsamoro.
Dungan niining programa ang pagpangapud-apud sa Philhealth cards ug scholarship
certificates sa mga nakatapos sa sekondarya ug gustong motungha sa kolehiyo.
Apil sa mga ahensyang mosalmot ang Department of Social Welfare and Development
(DSWD), Technical Education and Skills Development Authority (TESDA),
PhilHealth, Department of Agriculture ug Commission on Higher Education (CHED).
Gipaabot nga pagatambungan sa nagkalain-laing dignitaries ang maong okasyon nga
gilangkuban sa mga miyembro sa International Contact Group (ICG) ug mga
stakeholders gikan sa international community. (PIA-Bohol/ECBongosia)
No comments:
Post a Comment