Cebuano news: Kapolisan milaum sa pagbalik sa pagpalisensya sa armas dinhi sa Bohol Kampanya batok sa loose fire-arms

By Rey Anthony H. Chiu

TAGBILARAN CITY, Bohol, February 14 (PIA) -- Milaum ang kapolisan sa Bohol nga mahibalik na nganhi ang pagproseso sa mga papeles sa pagpalisensya sa mga armas nga moboto. 

Kini human nakita sa mga tinugyanan sa Kampo Dagohoy ang kahasol nga nasinati sa mga tag-iyahag armas nga lisensyado nga magkinahanglan pang moadto sa Sugbo aron sa pagrenew sa ilang rehistro. 

Nahadlok ang Kampo Dagohoy nga kini unya nga kahasol maoy magpatay sa kasibot sa mga tag-iyahag armas sa pagrenew hinungdan sa pagdaghan sa saag nga armas. 

Didto sa Kapihan sa Kampo, si PSSupt Constantino Barot mibutyag usab nga napaundang ang pagdawat sa mga papeles sa pagpalisensya sa armas dinhi human kini putla sa Buhatang Rehiyonal sa Kapolisan tungod sa dili maayong pasangil. 

Matud pa sa estorya, mas mahal ang bayad sa pagpalisensya sa armas kon dinhi himoa sa Bohol. 

Apan, gipaambit sa hepe sa kapolisan sa Bohol nga nasuta sa imbestigasyon sa kapolisan nga mismo ang mga tag-iyahag armas nga gipalisensyahan mao nay mihatag sa sobra nga bayad tungod sa pagpahinungod sa kahasul. 

Mas dako pa ang magasto kon pangunayan og lakaw sa tag-iya ngadto sa Sugbo, bisan kon ang kwentahon ang kahasol lamang, matud sa usa ka naghupot sa lisensyadong armas. 

Ang pamasahe lamang ug ang magasto sa kaon kon moadto ka sa Sugbo, molabaw pa gayud sa mopahinungod na lang, dason niya. 

Sa natuki sa imbestigasyon, milaum si Supt. Barot nga ikabalik na sa Bohol ang pagproseso sa lisensya sa armas. 

Dugang niini, mapasalamaton si Barot tungod kay misanong dayon ang mga bol-anon sa ilang panawagan sa pagpa-asikaso sa mga expired nga lisensya sa pusil. 

Mitala sa 100% ang accomplishment sa Bohol sa pagparenew sa mga armas samtang padayon usab ang mga kapolisan sa kalungsuran sa pag-aghat sa mga naghupot og armas nga saag sa pagtahan na lang niini sa kapolisan. 

Mas lisud kon makasuhan na hinoun og illegal possession of fire-arms, usa ka bug-at nga salaud nga nagtangag og pait nga silot, matud ni Police Inspector Fidel Tutor. (mbcn/rahc/PIA7 Bohol)