Cebuano news: Gobyerno sa Phl, nagpasalamat sa Saudi sa paghatag og blood money

By Elvira C. Bongosia

TAGBILARAN CITY, Bohol, Feb. 3 (PIA) - -Nagpasalamat ang gobyerno sa Pilipinas sa pagtubag sa Saudi Arabia sa 2.3 milyon Saudi Riyal nga kulang nga blood money alang sa overseas Filipino worker (OFW) nga si Rodelio "Dondon" Lanuza.

Sa gipagawas nga statement sa Department of Foreign Affairs (DFA), nagpasalamat usab si Foreign Affairs Secretary Albert Del Rosario kang Vice President ug Presidential Adviser on OFW Concern Jejomar Binay alang sa natigom nga 700,000 Saudi Riyals sa pamilya ni Lanuza. Gipasalamatan usab sa kalihim ang tabang sa mga Pilipino alang sa kababayang OFW.

Una nang gikumpirmar ni Binay nga dili madayon ang pagbitay kang Lanuza.

Giingong gitawagan siya sa embahada sa Saudi Arabia kagahapon ug gipaabot ang balita nga gitubag ni King Abdullah ang 2.3 milyon Saudi Riyals o kapin P25 milyon nga blood money.

Apan gi-klaro niini nga dili dayon makagawas sa bilangguan si Lanuza tungod kay kinahanglan pang dalhon sa korte ang Royal decree aron makapagawas og release order ang Saudi court.

Tuig 2000 sa dihang napatay ni Lanuza ang usa ka Saudi national nga nanutok niya og kutsilyo ug giingong padung siya panamastamasan niini.

Plano usab sa gobyerno sa Pilipinas nga mangayo og tabang sa hari sa Saudi Arabia alang sa kinabuhi sa usa ka OFW nga napahamtangan usab og silot nga kamatayon.

Nameligro pa gihapon nga mabitay si Joselito Zapanta tungod sa giingong pagpatay sa usa ka Sudanese landlord niadtong 2009.

Matud pa ni Binay, mahuman na sa Marso ang upat ka buwang gitakda sa pamilya ni Zapanta aron makumpleto ang P44 milyong blood money diin P10 milyon pa lang ang natigom karon.

Apan ang maayong balita usab, gikunhoran sa P33 milyon ang blood money. Bisan pa niini, P23 milyon pa gihapon ang kinahanglang matigom. (mbcn/ECB-PIA 7, Bohol)