Hapsay ug tunhay ang unang adlaw sa klase karon

By Juju Manubag-Empuerto

CEBU CITY, Hunyo 7 (PIA) –- ‘Hapsay ug tunhay ang unang adlaw sa klase’ gawas sa duha ka mulo nga natagaan dayon ug solusyon. Mao kini ang gipahibalo ni Ms. Eda S. Cabantan, ang hepe sa rehiyonal Oplan Balik Eskwela Action Center sa DepEd-7 ngadto sa Philippine Information Agency- Cebu. 

Matod pa ni Cabantan, ang unang mulo iyang nadawat sa ilang Action Center mao ang reklamo kabahin sa usa ka bata nga anaa sa ikatulong ang-ang nga dili na gustong mobalik ug sulod sa Tejero Elementary School tungod sa gisungog kini sa iyang mga klasmet. Buot sa bata nga adto kini mo-eskuyla na lang sa Mabolo Elementary School. 

Si Cabantan mitambag nga adtoon si Dr. Rhea Mar Angtud, ang Cebu City Division School Superintendent para sa tabang nga ilang gikinahanglan. 

Ang ikaduhang mulo nga nadawat ni Cabatan mao ang tawag gikan sa Minglanilla nga nagpahibalo nga dunay 20 ka buok nga mga tinun-an nga wala maka-enroll tungod gipangayoan kini sila ug amotan sa Minglanilla Central School. 

Gipahibalo ni Cabantan nga sa iyang pakisusi sa prinsipal sa maong tunghaan, nasuta niya nga wala makadawat ug taho ang maong prinsipal nga dunay amotan silang ginakolekta. 

Si Cabantan mipahimangno ngadto sa publiko nga ug mahitabo kini nila nga kolektahan ug amotan nga moadto sa prinsipal sa maong tunghaan ug adto magpalista.tungod walay gitugutan bisan si kinsa nga mangolekta ug amotan. 

Segun sa DepEd Order no. 41, 2012 nga serye, si Edukasyon Kalihim Armin Luistro mihatag ug direktiba para sa tanang opisyales sa mga tunghaan nga walay himoong kolekta gikan sa mga tinun-an sa kindergarten hangtod sa kwarto grado sa tibuok tuig sa pagtungha nga 2012-2013. 

Wala usab nga ikolekta himoon karong bulan sa Hunyo hangtod sa Hulyo rong tuiga alang sa kinto grado hangtod sa ika-upat nga ang-ang sa hayskol nga mga tinun-an. 

Apan, sugod sa Agosto 2012 hangtod sa human sa klase sa tuig 2013, ang mosunod nga mga bayranan mahimo nga kolektahon, apan boluntaryo ra kini sama sa Boy Scouts ug Girl Scouts membership fees nga P50; Philippine National Red Cross, P35; Anti-TB fund drive nga P5; school publication fee nga P60 sa kada tinun-an sa elementarya ug P90 matag tinun-an sa hayskol. Ang Parents-Teachers Association fee kinahanglan resonable ug i-determinar pa inig may tigom ang PTA. 

Ang PTA makakolekta sa tampo sa bulan pa sa Agosto ug anha na inig human ug pakita sa mga miyembro sa PTA ug prinsipal ang asoy sa paggamit sa awahing tuig nga kolekta ug sa gi-proponer nga badyet para karong tuiga nga may han-ay nga aktibidades o kalihukan.. 

Sa laing bahin, gipahibalo sa opisyal sa DepEd nga kada dibisyon sa tunghaan adunay ‘Oplan Balik Eskwela Action Center’ aron maadto-an sa mga ginikanan, magbalantay, magtutudlo ug mga tinun-an nga ikapadangat ang ilang mga mulo ug katagaan kini ug kasulbaran.. 

Ang rehiyonal buhatan sa DepEd-7 aduna ining sentro nga gidumalaan ni Eda S. Cabantan, hepe sa Administrative Division. Ang sentro mahimong tawagan sa numero sa telepono 4147366. (PIA-Cebu/JSME) 

=============

Siquijor DTI, LTO mipahimangno sa istriktong pagpatuman sa balaod sa helmet

By Rizalie A. Calibo

SIQUIJOR, Hunyo 7 (PIA) -- Sugod karong Agosto istrikto ng ipatuman ang balaod sa helmet kon Helmet Law sa lalawigan sa Siquijor. 

Buot pasabot niini nga ang tanang mga drayber sa motorsiklo ingon man ang ilang mga angkas kinahanglan na gayud magsul-ob sa standard protective helmet samtang nagbiyahe, sumala pa sa Land Transportation Office (LTO) ug sa Department of Trade and Industry (DTI) atol sa usa ka tigom nga gihimo niadtong Mierkoles sa Capital Square, Siquijor, Siquijor. 

"The law is not created to bring discomfort to the riders but to protect them and promote safety," (Ang balaod wala gihimo aron paglisod-lisod sa mga biyahero hinuon paghatag kanila ug proteksyon ug pagpromoter sa kaluwasan sa katawhan), matud ni DTI Provincial Director Nimfa Virtucio samtang iyang gihisgutan anag nagkadaghang kaso sa kadaot sa ulo ug mga aksidente gumikan sa wala paggamit ug standard nga helmet. 

Si Supervising Transportation Regulation Officer Gerald Dominguez usab miingon nga ang LTO ug ang Philippine National Police (PNP) sa Siquijor si milabayng mga bulan nanghingusog na daan sa ilang kampanya sa paggamit ug protective helmet bisan pa man unsa ang klase niini apan sugod karong Agosto, kinahanglan na gayud motuman sa balaod. 

Sumala pa niya nga ang LTO gimandato pagpatuman ug pagdakop niadtong mga misupak sa balaod uban sa kasamtangang silot nga: P1,500 alang sa unang salaod; P3,000 sa ikaduha, P5,000 sa ikatulo, ug P10,000 sa dugang pang mga salaod ingon man pagsakmit ug suspensyon sa lisensya sa drayber. 

Ang LTO makiglambigit sa DTIa lang sa hustong pag-ila sa marka standard protective helmet aron pagpatuman sa kadalanan, sumala pa niya. 

Si Virtucio usab miingon nga kadtong mga drayber nga adunay helmet nga dili standard kinahanglan mopalit niadtong adunay marka nga Product Standard kon PS mark alang sa mga lokal nga hinimo ug Import Commodity Clearance, kon ICC marks, alang niadtong ga imported nga helmet. 

Aduna pa kamo’y duha ka bulan aron makapalit ug bag-o, sumala pa ni Dominguez ug ni Virtucio. 

Si Virtucio midugang nga ang DTI naghimo na ug mandatory inspection sa mga suplayer ug mamaligyaay sa helmet aron pagsiguro ug pagpromoter sa paggamit sa standard nga helmet. 

Iya usab gidasig ang mga mamalitay sa pagkareponsable ug pagreport gilayon sa DTI niadtong mamaligyaay sa peke ug dili standard nga helmet. 

Ubos sa balaod, ang mga manghimoay ug mamaligyaay ug helmet kinahanglan mokuha ug PS license kon ICC mark una mobaligya o mopagawas sa ilang produkto, sumala pa ni Virtucio. 

Ang tigum gitambangon sa mga drayber samotorsiklo ug habal-habal, empleyado sa PNP, Philippine Information Agency (PIA), ug representate sa duha ka mantalaan sa lalawigan. (RAC-PIA 7, Siquijor)