Relihiyoso'ng mga antik naghimo sa Argao nga destinasyon sa mga turista

CEBU CITY, April 26 (PIA) -- Ang munisipalidad sa Argao mamahimo na unya nga usa sa mga historical tourist destination dinhi sa Sugbo, sanglit ang karaan nga simbahan sa nahisgutan nga lungsod nagpasundayag og mga relihiyoso nga antik naggikan pa niadtong ika 15 nga siglo (15th century).

Ang Museu de la Parroquia de San Miguel sa lungsod sa Argao habagatang bahin sa Sugbo, nagtigum og mga antik o karaan nga mga rebolto nga ginama sa bulawan,(gold) pilak, (silver) garing, (ivory) ug uban pa nga relihiyoso nga mga simbolo sama sa altar ug tabernakulo nga ginama sa kahoy o tabla.

Makita usab sulod sa naasoy nga museyo ang karosa nga ginama sa pilak ug gigamit sa pagpahigayon og mga relihiyoso nga prosesyon niadtong unang panahon, apan dili kini sama sa uban nga mga karosa karon tungod kay kini nga karosa lingin ug tuyo nga gikulit pinaagi sa pilak ug garing.

Anaa usab sulod mismo sa nahisgutan nga museyo ang una nga bangko nga gigamit sa parokyano panahon sa misa niadtong karaang panahon. Ang maong bangko ginama sa unique nga klase ug maayong kalidad sa table nga bisan pa man pila na ka dekada ang nilabay makita gihapon karon ang maong bangko nga wala na unsaay.

Nahimutang ang museyo sulod mismo sa karaan nga simbahan sa lungsod ang Parroquia de San Miguel (St. Michael de Archangel Church), nga maisip usab nga usa usab sa mga tipik sa kasaysayan sa lungsod nga gitukod niadtong 15th century.

Matud pa ni Engracia Birondo, ang municipal public information officer sa Argao, nga ubay ubay na usab nga mga estudyante gikan sa mga unibersidad sa sulod ug gawas sa probinsya sa Sugbo ang nibisita sa nahisgutan nga museyo alang sa ilang educational ug historical references.

Dugang pa ni Birondo nga dako kaayo nila nga garbo nga makapahigayon og educational tours ngadto sa mga tinun-an nga nagpakita usab sa lokal nga kasaysayan sa probinsya hilabi na gayud sa lungsod sa Argao

Bukas ang museyo matag adlawng Sabado ug Dominggo sa alas 9:00 -11:30 sa buntag ug 2:00 – 4:30 s hapon samtang modawat usab sila ug bisita by appointment matag Lunes hangtud Biyernes.

Matud pa nga ang nahisgutan nga museyo nakamugna usab og kinitaan sanglit ang bisita nga moduaw dinhi mobayad man og tag P20 matag usa apan gitagaan usab og special rates ang mga tinun-an.

Ang mga tinun-an sa kolehiyo ug high school mobayad lamang og tag P10 matag usa samtang ang mga tinun-an sa elementary ug pre-school mobayad lamang og tag P5.

Si Nicolasita Pangan usa sa mga caretakers sa naasoy nga museyo nagkanayon nga ila gayud nga gigahinan og panahon ang pag mentinar ug pagseguro nga anaa sa maayo nga kahimtang ang ang museyo sanglit usa man kini sa mga makasay-sayon nga bahandi nga makita lamang sa Argao.

“Amo gyud ni siya nga bantayan diri, usa gyud ni sa among angay nga ikapasigarbo diri, dugay na gyud kaayo ni sila, nagpasalamat mi hangtod karon naa gihapon” matud pa ni Pangan.

Dugang pa niya nga ang kagamhanan sa lungsod sa Argao nitabang usab sa pagmentinar sa museyo pinaagi sa pagbansay bansay sa mga caretakers kabahin sa ensakto nga pagdumala sa mga historic relics ingon man unsaon usab ang pag accomodate ug pag paghibalo ngadto sa mga bisita mahitungod sa kamahinungdanon niini nga mga relihiyoso nga antik. (mbcn/AS/PIA-Cebu)

============
20 mil ka trabaho sulod sa mga jobs fairs karong Mayo 1

CEBU CITY, April 26 (PIA) -- Adunay mga 20 mil ka mga trabaho ang naghulat sa mga aplikante dinhi sa Central Visayas nga mamahimong makit-an sulod sa mga nagka lain-laing jobs fairs nga ipahimutang sa Department of Labor and Employment karong Mayo 1 agi'g pag selebrar sa Labor Day.

Si DOLE 7 Regional Director Atty. Ma. Gloria Tango malipayon nga mipadayag nga ang probinsiya sa Sugbo pinaagi ni governor Gwen Garcia mipasalig sa paghatag og pundo alang sa pagmuntar sa usa ka jobs fair nga pagahimu-on didto sa Cebu International Convention Center ubos sa pagdumala ni Dr. Mathea Baguia sang hepe sa Cebu Public Employment Service Office.

Samtang ang Cebu City ubos ni mayor Michael Rama mo-sponsor usab sa usa ka overseas job fair, pinaagi sa Department of Manpower Placement and Development nga gipangulohan ni Fidel Magno didto sa Abellana National High School.

Lain usab nga local ug overseas job fair ang ipahigayon sa Robinson’s Place Dumaguete City , Negros Oriental nga gidasig ni Mayor Manuel Sagarbarria.

Si Director Tango midugang nga aduna usa'y job fair didto sa SM Trade Hall karon Mayo 1 gihapon.

Kini nga mga jobs fairs gisalmutan sa mga lain-laing kompanya nga nanginahanglan ug mga trabahante. Pipila niini mao ang mga call center companies, mga malls ug mga kompanya sa mga food products. (mbcn/hfg/& Darling May Deita/ CNU Comm Intern)

============
Mga aktibidades sa umaabot nga Labor Day

CEBU CITY, April 26 (PIA) -- Nagkalain-laing maka-aghat nga kalihokan ang gi-andam sa Department of Labor and Employment (DOLE-7) alang sa kasaulogan sa Labor Day karong umaabot nga Mayo 1, dinhi sa Central Visayas.

Human sa tulo ka buwan nga pag-pangandam, ang DOLE-7 , kauban ang ilang mga Tripartite Councils, mipahibawo na sa mga kalihokan nga ilang gihikutar sulod sa taas nga panahon.

Si DOLE–7 Chief Atty. Ma. Gloria Tango, mao’y mi-atiman sa mga preparasyon uban ni Assistant Regional Director Lilia Estillore aron masiguro nga hapsay ang dakong kasaulogan niini matag-tuig.

Ang maong kasaulogan sa Labor Day 2012 sugdan sa usa ka “Solidarity Run” gikan sa lain-laing punto sa syudad sa Lapu-lapu, Mandaue, Cebu ug Talisay.

Usa ka Labor Day Caravan ang magsunod sa mga managan unya sila mag-tipon sa University of San Carlos – South Campus. Ang manguna sa maong selebrasyon mao ang Labor Tripartite Council on Education nga gipanguluhan ni Rev. Fr. Eduardo Ventic sa Saint Joseph Academy.

Si DOLE-7 Supervising Labor Employment Officer Engr. Vicente Abordo miingon usab nga usa ka santos nga misa ang ipahigayon unya inigka human sa caravan ug usa ka commemorative program ang mopa-tugbaw sa aktibidades.

Sundan kini sa oath-taking sa bag-ong Tripartite Council for the Maritime Sector ug ang rilis sa mga livelihood grants.

Aduna usa'y “Tabo sa Mamumuo” kung diin kini mag-halad ug baratong presyo sa mga palitunon sama sa bugas, de lata, mantika ug uban pa. Kini gipasiugdahan sa Regional Tripartite Wages and Productivity Board.

Aduna’y 20 ka mga establisyemento ang mi-paslig nga mo-apil ug mag-baligya sa mga palitunon sa ubos nga presyo.

Sa laing bahin, si Director Tango mihisgot usab sa pag-kugi sa mga tripartite councils mao nga nagpabiling malinawon ang Central Visayas, ilabi na sa Sugbu, syudad sa Lapu-lapu ug Mandaue.

Mao usab ang mga Industry Tripartite Councils in Education; Shipbuilding; Business Process Outsourcing; Hotel Resorts and Restaurants; ug ang Maritime. (mbcn/hfg/PIA-7 & Translated by: Darling May Deita/ CNU Comm Intern)

============
10 ka estudyante sa Siquijor mipasa sa DOST scholarship

SIQUIJOR, Apr 26 (PIA)—Napulo ka mga estudyante dinhi sa probinsya sa Siquijor ang mipasa sa SY 2012-2013 Science Education Institute (SEI) scholarship sa Department of Science and Technology (DOST).

Kini gipagawas dili pa lamang dugay ni DOST-Siquijor Provincial Director Mario E. De la Pena kinsa miingon nga kini mao ang unang higayon nga daghan ang mipasa gikan sa probinsya ug nga ang tanang munisipalidad aduna’y representate.

Ang mga mipasa mao sila si Zaidy Martin sa San Antonio High School, Sugar Kenn Atay, Saturnino Banting Jr., Lovely Pearl Cenas, ug Stiffany Jane Tumapon sa Siquijor Provincial High School, Steven Sunogan sa Lazi National Agricultural School, ug Krystyl Tedlos sa Enrique Villanueva National High School.

Ang tulo ka lain pang mipasa nagtungha sa Sisters of Mary School Boystown sa Cebu apan naggikan mismo sa Siquijor. Sila mao si Alamid Edayan sa Bonga, Maria, Jherold Adam Magsanay sa Tacloban, Siquijor, ug Vilmar Vicoy sa Canlambo, Larena, Siquijor.

Ang bag-ong mga scholars ubos sa RA 7687 Scholarship Program makadawat ug ayuda sa tuition fee ug uban pang bayranan ingon man book allowance, monthly living allowance sulod sa 10 ngadto sa 11 ka bulan matag tuig.

Ang DOST-SEI Merit scholars usab makadawat sa maong kaayohan ubos sa RA 7687 scholars gawas sa pro-rated nga binulan nga stipend depende sa socio- economic status sa pamilya. (mbcn/RACalibo/PIA-Siquijor)

===========
Seminar sa mga empleyado sa gobiyerno gipahigayon sa CSC-Siquijor

LARENA, Siquijor, Apr 26 (PIA)--Mipahigayon sugod kagahapong adlawa (April 24) ang Civil Service Commission (CSC) ug duha ka adlawng pagbansay-bansay alang sa 24 ka mga empleyado sa lokal ug nasyonal nga kagamhanan didto sa Civil Service Commission-Siquijor Field Office Training Hall, Old Capitol Building, Larena, Siquijor.

Ang maong bansay-bansay nga ginganlan ug Values Orientation Workshop gatumong pagpalig-on sa mga kinaiya ug mga angayng gimbuhatan sa usa ka mamumuo sa gobyerno aron usab malig-on ang ilang komitment sa ilang napiling tahas.

Gatumong usab kini paghan-ay sa usa ka action plan aron mosuporta sa ilang gikomitir nga mga buluhaton pagpalig-on sa serbisyong publiko, sumala pa ni CSC-Siquijor Provincial Director Atty.Gina A. Crucio.

Lakip sa mga aktibidades niini mao ang presentasyon ug workshop kabahin sa “Sino Ako,” “Hiwaga ng Buhay,” “Ang Kalikasan at Ako,” “Mangarap Tayo,” “Sa Totoo Lang, Ganito ‘Yon,”, and “Mabuhay Pinoy” sa unang adlaw.

Samtang ang ikaduhang adlaw, naghisgot sa Serbisyo Publiko, “Professionalism”, workshop kabahin sa “Paglalagom,” “Pananagutan Ko, Paninindigan Ko” nga gipasabot tanan ni Prolaine D. Daclan sa CSC-7 Public Assistance and Liason Division.
Ang mga mamumuo, matud pa niya, kinahanglan usa ka propesyonal sa matang sa katakos, kahibalo, kinaiya, pamustura ingon man sa iyang mga nahimo sa pagpamuo.

Human sa mga presentasyon, gipahimo ang mga partisipante ug “personal mission statement ug commitment.

Akog gilauman nga ang maong bansay-bansay, makahatag ug positibong epekto ngadto sa mga partisipante ug uban pang mamumumo aron mouswag ang matang sa ilang serbisyo sa tagsa-tagsa ka mga buhatan. (mbcn/RAC/PIA-Siquijor)