Dos mil ang gibana-banang motambong sa pagsaulog sa International Women’s Day ugma dinhi sa Sugbo

By Juju Manubag-Empuerto

CEBU CITY, March 7 (PIA) -- Ugma saulogon ang International Women’s Day, Marso 8 ug gibana-bana nga 2,000 ang motambong sa mga nagkalain-laing organisasyon sa kababayen-an dinhi sa Sugbo ug uban pang mga ahensya sa gobiyerno ug pribadong sektor sa pagahimoong parada sa alas sais sa buntag nga magsugod sa Department of Health, Fuente ug motapos sa Plaza Sugbo.

“Kababayen-an Padayong Mibarug sa Kausaban sa Kinaiyahan: Maayong Pangagamhanan, Tulubagon sa Tanan”, mao ang tema sa selebrasyon sa International Women's Day karong tuiga. 

Cebu City Women’s Welfare and Family Affairs officer Camila Satina miingon nga ang parada magsilbe nga patugbaw alang sa selebrasyon sa mga kababayen-an kada Marso sa tanang tuig.

Gipahibalo usab ni Satina nga adunay ‘wellness and healthcare’ nga mga serbisyo nga ipanghatag alang sa unang 100 ka mga babaye nga mauna sa pag-abot ug magpalista. 

Ang ihatag nga mga serbisyo magsugod sa alas 9 sa buntag ug hangtud lang kini sa alas 4:30 sa hapon ugmang adlawa.

“Ang libre nga paghiling sa kolesterol, anemia, kidney, bone density ug ultrasound himoon sa usa ka pribadong botika diin aduna silay 3 ka mga doctor nga mohimo sa nagkalain-laing paghiling,” sumala ni Satina.

Aduna usa'y pagahimoong libreng pagputol sa buhok, manicure, pedicure, masahe ug reflex ugmang adlawa didto sa Plaza Sugbo, matod pa.

Ang Cebu City Health Department (CCHD) mopahigayon usab ug triglyceride level test, pneumonia exam ug OB-gynecology nga pagkonsulta.

Gipahibalo usab ni Satina nga ang Perpetual Succour Hospital (PSH) mi-komit usab sa paghatag alang sa tibuok bulan sa Marso ug mga diskwento sama sa 10 porsiyento para sa kwarto ug 20 porsiyento alang sa laboratoryo nga mga eksaminasyon, xray, mammogram, ultrasound, plain nga ct scan, MRI, ug ubang pamaagi nga espisiko alang sa mga babaye.

Ang serbisyo sa PSH alang lamang sa mga babaye nga nag-edad ug 18 pataas ug dili sakop sa Government Service Insurance System (GSIS) ug mga senior citizens.

Sa panapos si Satina miingon nga ang aktibidades sa Bulan sa Kababayen-an sa Sugbo usa ka panagtambayayong tali sa publiko ug pribadong sektor nga ang tumong molambo ang katungod ug gahum ang mga kababayen-an sa tanang aspeto sa kinabuhi. (mbcn/Juju S. Manubag-Empuerto/PIA-Cebu

==========

Kaangayan ug gahum alang sa mga kababayen-an malamboon dinhi sa Sugbo

By Amorganda A. Saludar

CEBU CITY, March 7 (PIA) -- Katawhanong kaangayan ug pagpalambo sa katungod ingon man gahum sa mga kababayen-an (gender equality and women empowerment) nagsugod na pag epikto dinhi sa Sugbo ug sa Pilipinas sanglit ang nasud gikonsederar nga usa sa nag-unang mga nasud nga nakakab-ot sa tumong sa gipausbaw ang moral ug dignidad sa mga kababayen-an.

Si SIDLAK – Gender Research Center Coordinator Dr. Rhodora Bucoy nipasupot niini atol sa gipahigayon nga PIA Kapihan dili pa lang dugay, diin naghisgot sa mga isyu kalabot sa mga kababayen-an nga may kalambigitan usab sa kasaulogan sa Women’s Month nga nagdala sa tema’ng “Women Withering Climate Change: Good Governance and Accountability Everyone’s Responsibility.”

Sumala pa ni Bucoy nga sa kasamtangan ug sa nanglabay nga mga katuigan dili pa lang dugay daghan na mga kababayen-an ang naedukar diin naghatag usab kini kanila og oportunidad nga makiglambigit ug mokupot ug posisyon sa kagamhanan ug academe ingon man sa patigayon diin ang mga kababayen-an natagaan na og importante nga papel sa paghimo og mga desisyon ug mga gimbuhaton may kalambigitan sa pagpalambo .

Dugang pa niya nga daghan na usab nga mga kababayen-an karon ang nagpakita og interes sa politika apan dili kini daghan kumpara sa mga kalalakin-an apan bisan pa man niini aduna gihapo’y representasyon ang mga kababayen-an sa natad sa politika.

Matud pa ni Bucoy nga dinhi sa Pilipinas nakabaton lamang kita og duha ka mga presidente nga babaye apan aduna usa’y sama kang Leticia Ramos Shalani nga nakahupot og nagkadaiyang posisyon sa gobyerno ug nireprsentar sa nasud ingon man nikupot og posisyon sa United Nation.

Niining mga nahisgutan nga dagkong kalambuan sa estado sa mga kababayen-an ang edukasyon maoy nag-una diin daghan ang mga kababayen-an ang nalambigit, nipokus ug nipakita og interes.

Gibutyag ni Bucoy nga usa sa mga dakong katungod nga gihatag ngadto sa mga kababyen-an mao ang right to suffrage nga gisugdan niadtong 1930 diin ang mga kababayen-an gitagaan og katungod nga makabotar ug makapili og leader nga alang kanila makasuporta ug mangulo kanila ug sa kinatibuk-ang publiko.

“Medyo dako-dako na gyud ang nakab-ot na changes and development natong mga women karon,” matud pa ni Bucoy.

Dugang pa niya nga ang Filipina karon makamao na nga mopadayag sa ug mopadungog sa ilang tingog ug sa sektor sa patigayon daghan na usab nga mga kababayen-an ang naghupot og importante nga papel o posisyon. (mbcn/AS/PIA-CEBU)