DOH miaghat sa publiko nga adunay kaya sa pagpalista sa PhilHealth 

CEBU CITY, July 10 (PIA) --- Usa ka opisyal gikan sa buhatan sa Department of Health nanawagan sa publiko nga dili pa miyemebro sa Philippine Health Insurance Corp. (PhilHealth) sa pagpamiyembro pinaagi sa pagbayad ug P1,200 isip annual premium.

Atol sa usa ka interview, gibutyag ni Health Undersecretary Gerry Bayugo nga aduna pay 4.8 ka milyon ka mga Pilipino ang dili miyembro sa PhilHealth bisan pa man ug aduna kini katakos sa pagbayad sa tinuig nga premium.

Kadaghanan matud pa sa 4.8 ka milyon nahilakip sa informal sector nga naglangkob sa mga drivers, helpers, mag-uuma, manangat, vendors ug uban pang mga self-employed persons.

Matud ni Bayugo, mokabat lamang sa P40 matag adlaw ang igahin sa usa ka tawo aron mahimong miyembro sa PhilHelath kung diin dili lamang siya ang makabenipsyo lakip na usab ang miyembro sa iyang pamilya.

Isip kabahin sa pagpaningkamot sa PhilHealth ug lain pang mga ahensya sa gobyerno sa pagpa-ubos sa matag Pilipino sa mga insurance program sa PhilHealth, mipahigayon kini ug national registration day program kada tuig nga ilang gitawag ug “PhilHealth Sabado”.

Ang labing unang PhilHealth Sabado gipahigayon niadtong Oktobre 2010 nga adunay tumong sa paghatag ug mga libreng PhilHelath Cards sa 5.2 ka milyon nga pamilya nga giila sa Department of Social welfare and Development isip Poorest of the Poor.(PIA-7/mbcn/Maryknoll B. Lague)

===========

3,500 ka mga seedlings gipananom sa mga luna sa Siquijor

CEBU CITY, July 10 (PIA) --- Mokabat sa 3,500 ka nagkalain-laing seedlings gikan sa buhatan sa Department of Environment and Natural Resources (DENR) ang gipang-apod-apod ug gipananom sa lain-laing luna sa probinsya sa Siquijor human gilunsad ang National Greening Program sa imaging buwan.

Usa sa mga partesipante sa maong kalihokan Joven Ando, nga nahinabi sa Philippine Information Agency (PIA) namahayag nga wala pa malakip sa maong gidaghanon ang mga gipananom sa lain-laing LGU, ahensya ug organisasyon gikan sa lain-laing lokal nga kagamhanan sa probinsya.

Si Provincial Environment and Natural Resources Officer Antonio Cabrido, mibutyag nga hugot ang pagpaningkamot sa buhatan sa DENR sa pagpanindot ug pagpananom ug dugang nga mga kahoy dili lamang sa mga kabukiran lakip na usab sa mga kilid sa kadagatan nga inanay nang nawagtangan sa mga mangrove trees.

Aron masiguro ang maayong pagtubo sa mga tanom, ang DENR mipahigayon usab ug serye nga mga orientation kalabot sa saktong pagpananom sa mga kahoy.

Gawas sa mga gipahigayong tree planting activity sa DENR, giaghat usab sa buhatan ang mga tunghaan ug kabarangayan sa pagsuporta sa programa pinaagi sa pagpatanom matag estudyante ug napulo ka seedlings matag tuig ug sa matag barangay 25,000 matag tuig.(PIA-7/mbcn/Maryknoll B. Lague)