P35.3B nga pondo, igahin sa DOH alang sa mga kabus nga adunay sakit

By Elvira C. Bongosia

TAGBILARAN CITY, Bohol, Aug. 14 (PIA) -- Giseguro ni Senate President Pro-tempore Ralph Recto nga dakung porsyento sa gigahin sa gobyerno nga P81.7 bilyon budget sa Department of Health for the National Health Insurance Program o NHIP ma-adto sa kapin upat ka milyong kabus nga pamilya sa atong nasud. 

Matud pa ni Recto, P35.3 bilyon ang gigahin aron malista sa mga programang maayong panglawas ang 14,700,000 ka “poor and near-poor families.” 

Tungod niini, tanang kabus o indigenous natong mga kababayan ang masakop ug maapil na sa health insurance. 

Dugang pa ni Recto, apil sa gigahinan sa pondong health program sa gobyerno ang P2.8 bilyon alang sa Family Health and Responsible Parenting, Rotavirus Vaccination sa 2,400,00 masuso, P10.2 bilyon alang sa mga tambal ug vaccines nga nagkantidad og P2.8 bilyon alang sa 2,700,000 kabataan nga mopaubos sa programang “Expanded Program on Immunization.” 

Gawas sa mga benepisyong makuha sa mga kabus natong kababayan sa DOH, mahatagan usab og trabaho ang 131 ka mga doctor ug 22,500 contractual nurses apil na sa 3,000 midwives nga ipakatap sa mga baryo o health centers sa nagkalain-laing dapit sa Pilipinas. 

Matud pa ni Recto, P3 bilyon usab ang gigahin alang sa maong mga health workers. 

Samtang P13.3 bilyon ang gigahin alang sa rehabilitation and construction sa 2,871 health facilities ug mga bag-ong equipment nga gikinahanglan niini diin ang 9 leading specialty hospitals, hatagan og P2.3 bilyon alang sa pagpatukod og mga bag-ong building ug medical equipment samtang gitun-an pa pag-ayo ang P4.3 bilyon nga kantidad sa mga gamit o apparatus nga makatabang sa kapasidad sa mga centers nga maghatag og maayong pagsusi ug pagtambal sa mga nanginahanglan. 

Tuyo sa pondong pang health program nga gigahin sa gobyerno nga matubag ang panginahanglan sa 962 barangay health stations, 1,265 health centers sa probinsiya, 561 hospital nga gidumala sa local nga kagamhanan ug 60 hospital nga ubos sa pagdumala sa DOH. (PIA-Bohol/ecb) 
http://www.pia.gov.ph/news/index.php?article=1081376296763 e