Marso 5, giuswag nga deadline sa aplikasyon sa Civil Service exam

By Elvira C. Bongosia

TAGBILARAN CITY, Bohol, Marso 3 (PIA) -- Gi-uswag sa Civil Service Commission (CSC) ang aplikasyon alang sa Career Service Professional and Sub-Professional written examinations ngadto sa Marso 5 (Martes). 

Petsa 28 sa Pebrero unta matapos ang pagsumitir sa aplikasyon alang sa Abril 14 nga pasulit apan gi-uswag kini aron mas daghan pa ang makakuha og eksaminasyon nga gikinahanglan kun mosulod sa gobyerno. 

Apil sa mga requirements ang mga mosunod: Application Form (CS Form No. 100, Revised 2012) nga makuha sa regional ug field offices sa CSC ug mahimo usab sa CSC website nga www.csc.gov.ph; 4 passport-sized ID pictures; original ug photocopy sa valid ID; original ug photocopy sa birth certificate gikan sa NSO o Local Civil Registrar kun walay date of birth ang valid ID; ug P500 nga examination fee. 

Mahimong isumitir ang application form sa buhatan sa CSC dinhi nga nahimutang sa Barangay Dampas ning syudad sa Tagbilaran. 

Alang sa ubang detalye, mahimong motawag lang sa ilang linya sa telepono nga 501-7046 o bisitaha ang ilang website nga www.csc.gov.ph http://www.csc.gov.ph/. (mbcn/ECB/PIA-Bohol)