Cebuano news: Deployment ban sa Iraq ug Yemen, gi-libkas na sa DOLE

By Elvira C. Bongosia

TAGBILARAN CITY, Bohol, March 6 (PIA) -- Mahimo nang makabalik og trabaho ang mga overseas Filipino workers (OFW) sa Iraq ug Yemen.

Kini human gibutyag ni Department of Labor and Employment (DOLE) Secretary Rosalinda Baldoz nga gi-libkas na nila ang deployment ban sa Iraq ug Yemen.

Matud pa ni Baldoz, kini tungod usab sa pagtangtang na sa Department of Foreign Affairs sa alert level human nahimong malinawon na ang grabeng kagubot kaniadto sa maong mga nasud.

Apan bisan pa niini, giingong kinahanglan unang mag-umol og bilateral agreement nga maoy mohimo og regulasyon sa pagtrabaho sa mga newly-hired o bag-ong OFW sa Iraq.

Alang usab sa mga daan nang nagtrabaho sa Iraq, mahimo na silang mobalik didto apan kinahanglang may ma-prisintar sila nga kontrata.

Kahinumdoman nga gihunong sa gobyerno ang pagpadala og mga Pinoy workers sa maong mga nasud tungod sa grabeng kagubot didto. (mbcn/ECB-PIA7 Bohol)