BALITANG BINISAYA

2012-02-11T22:36:00.000+08:00

Cebuano News: Hingtungdan ahensya ug ubang pundok naghiusa alang sa kalambuan sa Cebu Port area

By Amorganda A. Saludar

CEBU CITY February 9 (PIA) -- Ang Cebu Port Authority (CPA), Land Transportation Office (LTO), CITOM, Maritime ug PNP nakamugna na sa ilang tagsa tagsa ka mga paagi ug plano alang sa kalambuan sa aspeto sa seguridad ug kahamugaway sulod sa hurisdiksyon sa Cebu Port alang saekenomikanhong kalihukan dinhi sa tunga- tungang kabisay-an.

Atol sa usa ka Kapihan sa PIA gitataw ni Cebu Port Security and Safety Environmental and Management Department Manager Dir. Oscar Lopez nga sa kasamtangan ang CPA aduna na’y giandam nga mga roadmaps nga gitumong aron mapalambo ang mga port services lakip na usab ang turismo dinhi sa Sugbo.

Matud pa ni Lopez nga ang bag-ong pamunoan karon sa CPA nagtinguha gayod nga makab-ot ang dakong kausaban sa imahe sa pantalan alang sa seguridad sa mga pasahero ug turista nga mosulod ug gawas sa Sugbo.

Gipadayag usab niya ang uban sa mga dagkong plano sa CPA nga ipatuman karong tuiga sama sa pagpatunhay sa trapiko ug katakos sa Cebu Port alang sa kalibutanon kompetisyon; improvement sa mga kagamitan ug pasilidad ug kakugi ug kamabungahon sa mga trabahante sa pantalan ingon man pagpakunhod sa takna diin maghuwat ang mga kliyente kun ugaling adunay pagahimoon nga transaksyon tali sa pantalan.

Dugang pa ni Lopez nga ang uban sa ilang mga plano nasugdan na sama sa pag papahawa sa mga squatters nga nanimuyo sa dapit sa sakop pa pantalan lakip na usab ang pagdili sa mga traysikad nga moparking sa mga lugar nga wala itugot sulod sa pantalan.

Sa habig usab sa Maritime Unit dinhi sa rehiyon gibutyag ni Maritime Unit-7, Regional Chief P/SSUPT Eduardo Serapio Garado nga ila gayod siguroon nga aduna’y presensya sa kapulisan ug passenger assistance pinaagi sa pakigtambayayong Philippine Coastguard (PCG), pribado nga mga security ug kaadtong mga security nga kawani ubos sa CPA. Aduna usab sila’y gipahigayon nga regular joint monitoring uban ang PCG.

Matud pa ni Garado hangtod na sa sulod sa mga barko ug uban pang sakyanang pangdagat aduna’y mga sea marshal nga gipangulohan sa PCG, Navy ug Maritime Police Group.

Dugang pa usab niya sa mga kaso nga may kalambigitan sa human trafficking ang CPA aduna na’y giumol nga task force nga gilangkoban sa BID, DSWD, CPA, PCG ug sa uban pang hingtungdan kalabot sa kampanya sa human trafficking.

Samtang nagkanayon si Cebu City Police Office Director, P/SSUPT Melvin Ramon Buenafe nga ilang himoon ang ilang obligasyon aron mapatuman ang seguridad sa pantalan gani aduna silay gidestino nga police patrol gawas ug sulod sa pantalan.

Subay niini matud pa ni Buenafe nga hugtanon na nilang gipatuman ang city ordinance on Anti-Dispatching aron pagsumpo niadtong mga illegal dispatching sa pantalan.

Dugang pa niya nga panahon sa mga special occasions nakigtambayayong usab sila sa lain pang hingtungdan sa pagpahimutang og assistance desk uban sa Cebu Port Police ug Marina.

Ang Land Transportation Office (LTO-7), CITOM nipasalig nga motampo ug ilang kaugalingon nga lakang aron mapalambo ang imahen ug estado sa Cebu Port area, pinaagi sa pagpahimangno sa mga drivers sa pagtuman kanunay sa balaod trapiko ingon man pagsagop ug mga lakang alang sa seguridad sa mga pasahero sakay sa pampublikong sakyanan nga mohatod ug mokuha kanila sa pantalan.

Ang mga representante ug operator gikan sa CITRASCO ug ANDAR duha sa mga transport groups dinhi sa Sugbo nipasalig usab sa ilang kooperasyon kalabot niini. (mbcn/as/PIA-Cebu)

===========

Cebuano News: PNoy nipasalig sa mga biktima sa linog og dinalian nga aksyon gikan sa hintungdan ahensya sa gobyerno

By Amorganda A. Saludar

CEBU CITY February 10 (PIA) --- Atol sa iyang pagbisita sa siyudad sa Dumaguete ug Guihulngan sa Negros Oriental niadtong Pebrero 8, si Presidente Benigno Aquino III nimando gilayon sa tanan nga mga hintungdan ahensya sa gobyerno sa paghimo og dinalian nga aksyon sa pagtubag sa mga panginahanglanon sa mga biktima sa 6.9 magnitude nga linog hilabi na didto sa mga lugar nga grabeng naapektuhan niini.

Ang mga dapit nga nakaangkon og grabeng kadaot gumikan sa linog ug sa nahitabong landslide human sa linog naglakip sa Jimalalud, La Libertad, Bindoy, Tayasan, Mabinay, Ayungon, Planas ug Guihulngan City sa Negros Oriental.

Base sa taho gikan sa buhatan sa Regional Disaster Risk Reduction and Management Council (RDRRMC-7), si Presidente Aquino direktang nihatag sa iyang kamanduan ngadto sa mga hintungdan ahensya sama sa DPWH 7, Department of Trade and Industry (DTI), PHIVOLCS, AFP ug PNP ingon man sa mga local chief executives ug lain pa’ng hintungdan unit sa paghimo gilayon sa responsibilidad ug obligasyon sa tuyo nga matubag gilayon ang mga panginahanglanon ug mahatagan ug ayuda ang mga biktima sa linog.

Subay gihapon sa maong report ang Presidente nimando sa DPWH -7 nga paspasan ang pag-ayo sa mga nangaguba nga dalan ug taytayan sa mga dapit nga gihapak sa linog ug mohimo usab og inbentaryo sa publiko ug pribado nga inprastraktura pinasubay sa national building code sa Negros Oriental.

Iya usab nga gimanduan ang tanan nga mga local executives dinhi niining mga lugara nga mohatag og ayuda sa mga kawani sa PHIVOLCS sa pagpakatap og mga kasayuran kalabot sa linog ngadto sa publiko.

Nakadawat usab og kamanduan ang AFP ug PNP gikan sa Presidente nga nag-aghat kanila sa pagpatunhay sa kahapsay ug kalinaw sa pagpang-apod-apod ug paghatod niini sa mga pagkaon ug uban pa nga gikinahanglan sa mga apektadong dapit. Nakadawat usab og kamanduan ang DTI nga kinahanglang ilang siguroon nga magpabiling anaa sa normal nga presyo ang mga nag-unang palaliton.

Sa iyang habig sa Presidente Aquino nipasalig sa mga biktima sa linog dinalian unya nga pagbalik sa suplay sa kuryente ug tubig sulod lamang sa usa ka semana giluwatan usab sa Presidente nga siguradong panubag gayod ang si bisan kinsa nga magpataka lamang og sayop nga impormasyon nga makahatag lamang og kabalaka og kakulba sa publiko.

Isip tubag, ang mga local chief executives sa mga apektadong lugar ug ang local electric cooperative sa Negros Oriental dali dali gilayon nihimo og panagtagbo ug nakasabotan sa maong meeting nga ang elektrisidad mahibalik na sa nahisgutang mga lugar usa ka semana gikan sa maong panagtagbo.

Ug sa paghimo ning balita nihatag na og kasayuran ang NGCP nga mga 9:00 sa buntag niadtong Pebrero 9 aduna na’y kuryente ang uban nga parte sa La Libertad ug Jimalalud gumikan sa NGCP's Bindoy substation ug nga ang mga line crew padayon gihapon sa ilang pagpanghakot og mga lightweight steel towers didto sa lugar nga dali ra unya nga maabot sa helicopter.

Ang uban nga ahensya nga nisanong usab sa panginahanglanon sa mga apektadong pamilya sa mga dapit sa Negros Oreintal nga giigo sa linog naglakip sa DSWD, DILG,NEDA, PNP, Central Command, PMS, PCG ug PIA.

Nagtambayayong usab ang PDRRMC-Negros Oriental, DOH-7 ug DSWD-7 sa paghatag og mga pagkaon, mga tambal ingon man mga medical personnel, samtang nihatag usab og water purified systems ang MMDA.

Naghiusa usab ang Philippine Army, 703^rd CDC, 7^th RCDG, ARESCOM, PCG, Philippine Air Force gikan sa Western ug Eastern Command sa pagpahigayon og search, rescue and relief operation,samtang PNP PRO-7 ug NAVFORCEN maoy nagdala sa tanan nga mga relief goods padulong sa Negros Oriental.

Aduna usa’y gidestino nga mga kawani sa PNP sa maong mga dapit aron masiguro ang kahapsay ug kalinaw. (mbcn/AS/PIA-CEBU)

===========

Cebuano News: PHILVOCS nipasabot wala’y mahitabong tsunami dinhi sa CV

By Rey Anthony H. Chiu

TAGBILARAN CITY, Bohol, Pebrero 10 (PIA) -- Ang Philippine Institute of Volcanology and Seismology (PhiVolcs) nipasabot nga bisan kon maka-lapas sa magnitude 7.5 ang linog nga mahitabo dinhi sa kabisay-an, wala’y tsunami nga mamugna niini kay halos usa ka metros lang ang bawod nga mahimong mahitabo.

Si Engr. Nola Evangelista, usa ka research analyst sa PhilVocs-Bohol miingon atul sa usa ka pagpakighinabi sa radio nga sahi sa unang gipatoo, ang nakapasugod sa linog niadtong Pebrero 6 wala magsukad sa kamad-an kon dili gikan sa pipila ka kilometros gikan sa baybayon sa Tayasan.

Si Evangelista midugang nga kadto lamang mga linog nga magsugod sa ilawom sa dagat ang maka-pasugod sa dagkong bawon nga mobanlas sa yuta ug mas nailhan sa ngalan nga tsunami.

Gawas sa labing bag-ong paglihok sa yuta sa Tanon Strait sa Negros, wala magtoo ang PhiVolcs nga may faulting dinhing dapita, gawas sa una na nga nasayrang fault sa kasadpang Negros.

Segun sa Philvocs, ang tsunami makapadala ug bawod nga mobanlas sa gikusgong 500 milyas matag takna.

Evangelista miingon nga tungod kay ang fault sa kasubangang Negros nga naa sa kadagatan sa Tayasan ug Guihulngan duol sa laing mga isla, gilantaw sa mga tinugyanan nga dili makahunat ang bawod ug hayan dyutay lang nga paglihok sa tubig ang mahitabo.

Si Evangelista miingon nga ipagawas pa gihapon sa PhiVolcs ang tsunami alert No. 2, nga ang ipasabot: may pagbawod ug mapaabot ang dyutay nga pagtaas sa banlas sa dagat mga moabot sa usa ka metros ang gitas-on.

Niini usab nga warning, gipahimangno-an ang mga residente sa daplin sa dagat sa paghikling ngadto na sa mga lugar nga nasulod sa 20 metros gikan sa kinatas-ang maabot sa taub aron mahalikay sa kadaut.

Si Evangelista miingon nga tungod kay ang Bohol nasalipdan sa isla sa Sugbo, hayan ang mga maapektohang lugar nga maigo sa tagsa ka metros nga bawod mao ang western side sa Bohol lakip na ang mga isla sa Balicasag ug Pamilacan, “kon ang Tanon Strait nga fault ang mahugmak.”

============

2012-02-02T17:19:00.000+08:00

DOE 7 nipasalig nga aduna’y igong suplay

sa kuryente dinhi sa Sugbo karong tuiga

Ni: Amor Saludar

CEBU CITY February 2 (PIA) -- Ang Department of Energy (DOE-7) nipasalig sa publiko nga wala’y mahitabo nga power shortage dinhi sa Sugbo sa tibook tuig 2012.

Mao kini ang gitataw ni DOE -7 Regional director Antonio Labios atol sa gipahigayon nga Kapihan sa PIA dili pa lang dugay.

Matud pa usab ni Labios nga ang kinatibuk-ang probinsya sa Sugbo sa kasamtangan adunay power capacity nga mokabat ngadto sa 1, 600 mega watts nga igo makasuplay sa konsumo sa elektrisidad sa tibook probinsya.

Matud pa usa sa mga hinungdan niini ang nadugang nga 400 mega watts nga power gikan sa mga bag-ong naistalar nga mga power plants dinhi sa probinsya dugang sa mga kasamtangang tinubdan sa enerhiya nga nagsuplay og elektrisidad sa tibook probinsya.

Nidugang usab si Labios nga kasamtangan ang normal nga konsumo sa kuryente dinhi sa Sugbo moabot lamang og 1, 300 ngadto na sa 1, 400 mega watts ug naay sobra nga 200-300 mega watts suplay sa kuryente.

Gipasaligan usab niya ang publiko nga aduna pa’y igo nga reserba sa enerhiya o tinubdan sa elektrisidad dinhi sa Sugbo ug sa mga silingan niini nga dapit sa Visayas karong tuiga ug nga minos ang posibilidad nga masinati ang power shortage dinhi.

Apan gipahimangnuan usab ni Labios ang publiko nga aduna unya’y critical stage sa tinubdan sa enerhiya nga masinati sa umaabot tuig 2015 hangtod 2017 diin mahitabo unya ang minimal nga power shortage dinhi sa probinsya.

Apan gitataw hinoon niya nga magdepende lang unya kini sa mga investors nga moabot dinhi sa probinsya nga mo put up og mga planta nga mamahimong tinubdan sa enerhiya.

Sa kasamtangan ang DOE ug uban pa nga mga ahensya sa gobyerno nagpahigayon na og evaluation sa performance niadtong mga contractors nga ania sa probinsya og kasamtangan nga nahimo og survey ug eksaminasyon sa mga dapit nga nakitaan nga posibleng mamahimong tinubdan sa renewable energy o lain pang alternatibong tinubdan sa elektrisidad ug enerhiya.

Si Labios nagkanayon nga pinaagi sa ensakto nga tinubdan sa enerhiya ug pagkakaplag sa dugang pa nga mga dapit nga katukoran og dugang pa nga planta sa enerhiya makabaton unya ang mga katawhan og siguridad sa ilang konsumo sa enerhiya ug elektrisidad. (FCR/AS/PIA-CEBU)

2012-02-01T17:07:00.000+08:00

Ang dakbayan sa Sugbo nisaulog sa Civil Registration Month

by Juju M. Empuerto

‘mohatag ug libreng mga serbisyo sama sa birth certificate’

CEBU CITY, February 1 (PIA) – Sugod karong adlawa ug tibuok bulan sa Pebrero saulogon ang Civil Registration Month sa tibuok nasod.

Dinhi sa dakbayan sa Sugbo, ang maong selebrasyon magpahigayon ug mga libreng mga serbisyo.

Si Cebu City Civil Registrar Evangeline Abatayo mipahibalo nga ang P250 nga silot sa pagatrasaw sa rehistro sa bata kapin sa 30 ka adlaw nga giingon nga ‘reglementary period’ liwagan karong Pebrero atol sa maong selebrasyon.

Mipahibalo usab si Abatayo nga daghang nakalinya nga mga aktibidades sa pagsaulog sa Civil Registration Month.

Karond adlawa, may seminar nga ipahigayon ang ilang buhatan kabahin sa civil registration ug sa kadaghanan may kalabot sa civil documents, sumala ni Abatayo.

Sa Pebrero 14, Valentine’s Day ang mga Civil Registrar nga mga personahe uban sa mga kawani sa Family Planning Section sa City Health Department (CHD) mopahigayon ug Pre-Marital Seminar alang niadtong magpakasal dihang sa mga piniling lugar sa dakbayan.

Ang tibuok adlaw sa Pebrero 17 buhaton sa pagpang-isyu ug libreng civil registry nga mga dokumento sama sa birth certificate, marriage ug death certificates, sulti ni Abatayo.

Matod sa Civil Registrar nga mas paspas ang pagkuha ug mga dokumento karon ug ikatandi sa unang panahon kay gisugdan na nila ang pag-computerize sa ilang mga record. Ug gani, nagpadayonon pa kini.

Si Konsehal Lea Ouano-Japson kinsay chairperson sa konseho sa dakbayan sa mga babae ug kabataan, midasig niadtong mga ginikanan nga magparehistro pa sa ilang mga kabataan nga pahimuslan ang giingon nga pribilihiyo sa kagamhanang lokal kay alang ra kini sa tibuok bulan sa Pebrero.

Ang opisina sa Civil Registrar anaa nahimutang temporaryo sa unang andana sa CHD samtang nagpaabot kini sa paghuman sa gitukod nga kaugaling dakbalay nga gi-alokaran ug P20 milyones sa siyudad. (FCR/JSME/PIA-Cebu)

2012-01-30T15:22:00.002+08:00

Disaster management tukion sa lokal nga mga lideres sa NegOr

DUMAGUETE CITY, Jan. 28 (PIA) --- Ang mga lokal nga mga lider sa kagamhanan sa Negros Oriental gitakdang motuki sa mga isyu kalabot sa disaster management ug climate change atol sa ipahigayon nga duha ka adlaw nga seminar workshop karong umaabot nga Pebrero 8 hangtod 9, 2012 didto sa dakbayan sa Dumaguete.

Ang maong workshop adunay tema nga “Coping with Climate Change and Mitigating Disaster: Predictive Agenda Setting ug pagadumalahon sa South East Asia Institute of strategic Studies kon (SEAISS)” ug gipangulohan sa probinsyal nga kagamhanan sa NegOr.

Ang maong workshop buot maghatag ug dugang kaalam ngadto sa mga lokal nga lider kalabot sa mga angayang buhaton isip preparasyon batok sa lain-laing mga kalamidad, matud pa ni Capitol Information Officer Adrian Sedillo.

Si Sedillo usab kabahin sa operations section sa Provincial Disaster Risk Reduction and Management Council (PDRRMC).

Gawas sa disaster management, lakip sa tukion atol sa workshop mao ang climate change nga giila sa mga eksperto isip nag-unang hinungdan sa mga dagkong kalamidad nga miigo dili lamang dinhi sa nasud kundi lakip na usab sa ubang kanasuran.

Si Negros Oriental Gov. Roel Degamo pormal nang mipahibalo sa mga mayor sa probinsya sa paglangkob sa maong workshop alang usab sa kaayohan sa tagsa-tagsa nila nga mga lungsod ubos sa ilang pangagamhanan.(mbcn/PIA-7 & CTU/Maryknoll B. Lague)

2012-01-27T16:08:00.000+08:00

UN nang-apod-apod ug mga hygiene kits ngadto sa mga nagpasuso ug mabdos nga mga inahan nga biktima sa bagyong Sendong sa NegOr

DUMAGUETE CITY, Jan. 27(PIA) --- Dul-an sa 335 ka mga mabdos ug nagpasuso nga mga inahan nga apektado sa bagyong Sendong nakadawat niadotng Huwebes ug libreng mga hygiene kits gikan sa buhatan sa United Nations Population Fund (UNFPA).

Si Negros Oriental Gov. Roel Degamo maoy nangulo sa gipahigayong pagpang-apod-apod nga gipahigayon sa Session Hall sa dakbayan sa Dumaguete uban ni UNFPA Program Officer Dyezebel Dado ug sa bise mayor sa dakbayan Alan Gel Cordova.

Kahinumdoman nga ang gobernador mismo ang mipaabot sa iyang hangyo ngadto sa buhatan sa UNFPA alang sa libreng relief assistance alang sa mga liboan nga biktima sa bagyong Sendong sa ilang probinsya.

Matag usa ka hygiene kit, adunay sulod nga mga underwear, toiletries, batteries ug malong nga mamahimong himuong habol, banig ug bag, matud pa ni Dado.

Ang 335 ka mga hygiene kits nga gipang-apod-apod sa dakbayan kabahin sa kinatibuk-ang 1,585 ka mga hygiene kits nga ipang-apod-apod sa uban pang mga apektadong siyudad sa probinsya sa NegOr.

Gawas sa dakbayan sa Dumaguete, gikatakda usab nga mang-apod-apod ang UNFPA sa dakbayan sa Sibulan, Valencia ug Tanjay. (mbcn/PIA-7 & CTU/Maryknoll B. Lague)

2012-01-26T14:53:00.002+08:00

Administrative justice seminar gikatakdang ipahigayon sa Larena, Siquijor

LARENA, Siquijor, Jan 25 (PIA) – Ang Civil Service Commission (CSC-7) dinhi sa Central Visayas gikatakdang mopahigayon sa usa ka seminar kalabot sa administrative justice karong Pebrero 21-22, 2012 ug ipahigayon kini sa Salagdoong Beach Resort, Maria, Siquijor.

Matud ni CSC-7 regional director Atty. Judith Chicano, kining maong seminar ipahigayon alang sa mga public executives, managers, administrators, personnel officers/HRMOs, unit heads, government lawyers, legal chiefs and staff, grievance committees, union officers, hearing officers, designated investigators, ug uban pang mga kawani nga may kalabot sa pag-gunit sa mga kasong administratibo.

Ang maong seminar magsentro sa Uniform Rules on Administrative Cases in the Civil Service (URACCS) ug mga posibleng silot sa mga mapamatud-ang nakahimo ug kasal-anan agi sa kaso nga administratibo.

Dugang pang pagahisgutan sa maog kalihokan ang mga saktong proseso sa pagpahigayon ug silot sa mga mahimong kalapasan. Ipakita usab niini ang importansya sa pagpahigayon ug mga pre-hearing conference isip epektibong pamaagi alang sa mas dali ug paspas nga dagan sa mga kaso.

Ang registration fee mokabat sa P1,800 matag usa lakip na ang gasto sa snacks, paniudto, hand-outs ug uban pang mga gastohanan atol sa kalihokan.

Alang sa dugang mga impormasyon kalabot niini, mamahimong mobisita sa CSC Siquijor Field Office nga nahimutang sa Old Capitol Building, Larena, Siquijor. (mbcn/PIA-7 & CTU/Maryknoll Lague)

2012-01-19T15:26:00.001+08:00

Japan Chamber of Commerce to hold APEC-IT seminar

DUMAGUETE CITY January 19 (PIA) --- Ang Japan Chamber of Commerce and Industry dinhi sa nasud gikatakdang mopahigayon og website training ug marketing ngadto sa 80 ka mga estudyante ingon man sa mga small and medium enterprises (SMEs) sa siyudad sa Dumaguete.

Ang duha ka adlaw nga pagbansay-bansay pagasugdan karong adlawa hangtod Enero 20 adto sa Foundation University's James Herring Audio-Visual Room.

Nahimong tulay sa Negros Oriental sa nahisgutang pagbansay-bansay mao si Executive Director sa North Luzon Growth Quadrangle Area, Dr. Hermenegildo Dumlao pinaagi usab sa suporta sa Asia Pacific Economic Cooperation- Information Technology (APEC-IT) program.

Sumala pa ni Dumalao kini nga programa gisugdan sa mga piniling nasud niadtong tuig 2002 diin ang Pilipinas usa mga nasud nga napili sa isip benipisyaryo sa nahisgutang programa.

Ang APEC-IT training program resulta sa gipahigayong 4^th APEC Human Resources Development Ministerial Meeting didto sa nasud sa Japan niadtong September 2001 diin gitagaan og bili labaw sa tanan ang kamahinungdanon sa kooperasyon ug panagbayloay ug mga kasayuran tali sa mga ekonomiya sa pagsumpay sa mga digital nga pagbahin pagsagop sa kalambuan sa human resources sa mga nagpalambo nga nasud suod sa rehiyon

Ang maong pagbansay-bansay nahimong posible pinaagi sa pagpangama sa Overseas Vocational Training Assocaition (OVTA) u gang Ministry of Health, Labor and Welfare sa nasud sa Japan pinaagi sa inasyatibo sa APEC- Human Resource Development Seminar/Training Programme sa Adoption of IT of APEC-IT.

Ang Fujitsu Corporation maoy mohatag ug mga speakers ning duha ka adlaw nga APEC-IT seminar. (Translated into Cebuano by Amor Saludar/PIA-CEBU)

===========

Dul-an sa 4 milyones mitambong sa Sinulog sa Sugbo

Ni: Juju Manubag-Empuerto

CEBU CITY, January 17 (PIA) – Dul-an kwatro milyones ang midugok sa kagahapon nga Sinulog Mardi Gras sa Sugbo ug sa mga misa sa Sto. Niño Basilica nga matod pa ni Cebu City Police Director Ramon Melvin Buenafe pinakadaghang mitambong bisitang lokal ug langyaw sulod sa 32 ka tuig.

Gikataho nga dos milyones ang ang mitambong sa miaging tuig.

Karong tuiga, daghan usab ang miapil nga mga partisipante nga mga contingents nga taga-Sugbo, maingon sa mga silingang lugar.

Ang parada misugod ug ala-1:35 sa hapon sa Cebu City Sports Complex (CCSC). Nahuman ang parada ug alas-9 sa gabii nga gitak-uban ug masilakon ug magarbohon nga display sa mga kwitis nga milanat ug diyes minutops ug mikantidad ug 2.5 milyones.

Si Bise-President Jejomar Binay mitambong usab kagahapon ug mitimbaya sa mga nanambong sa CCSC ug “Pit Senyor” una kini manaog ug mitipon sa ruta sa nag-Sinulog.

Mitambong usab ang mga politiko sama nila Ramon ‘Bong’ Revilla Jr., Jinggoy Estrada, Teddy Casiño ug sila Francisco Tatad ug Miguel Zubiri nga mga kanhing senador.

Gidagsa usab ang parada kagahapon ug daghan mga turista, balikbayans, OFWs, artista sa telebisyon ug putting-tabing.

Ang mga dagkong istasyon sa telebisyon sa GMA, ABS-CBN ug TV5, uban ang ilang mga artista diha usab kagahapong adlawa.

Ang TV-5 mihimo ug internasyonal nga pagtaho alang sa mga wala makaanhi nga atua sa gawas.

Si Neil Sanchez, Operations Officer sa Office of the Civil Defense (OCD) miingon nga 27 ka buok nga mga istasyong medico ang gipamutang sa agi-an sa parada nga mitabang niadtong nalipong tungod sa kainit ug sa kakapoy.

Ang gihimong pagtak-op sa parada ngadto sa CCSC kay usa ka pasidungog kon ‘tribute’ sa Sugbo isip Asean City of Culture. Gipakita sa mga Sugbuanong mananayaw ang mga desinyo sa fashions accessories, furnitu

==========

Unom ka mayores sa Sugbo misuporta sa Balaudnon #42

By Juju Manubag-Empuerto

CEBU CITY, January 17 (PIA) – Unom ka mga mayors sa Sugbo misitar sa ilang suporta alang sa Senate Bill 42 nga mipunting sa pag-deklarar sa 90 porsiyento sa halin sa mga negosyo nga buwisan sa siyudad o munisipiyo diin ang ilang factory, planta ug opisina nahimutang.

Sila Mayor Valdemar Chiong sa Naga City, Aurelio Espinosa sa Toledo City Celestino Martinez Jr sa Bogo City, Democrito Diamante sa Tuburan, Ricardo Ramirez sa Medellin ug Ace Binghay sa Balamban miiingon nga mosaka ang kita sa mga kagamhanang lokal sa giingong balaudnon..

Malipayon ang mga mayores sa pagduso ni Senador Vicente Sotto III sa maong balaudnon para ang ilang mga lungsod ug dakbayan unahon inig pang-apodapod sa buwis gikan sa halin nga mga binayad sa mga imbestor nga dunay daan ng patigayon o tukuronon nga mga patigayon sa umaabot nga adlaw diha sa ilang mga siyudad o munisipyo.

Matod pa ni Atty Antoinette Clamor sa Bureau of Internal Revenue (BIR)-R/r 13 nga sa balaod,ang buwis adto ibayad kung asa milukat ug business permit ang usa ka pagpapatigayon o sa 'area of jurisdiction' niini. (FCR/JSME/PIA-Cebu)

2012-01-18T15:57:00.002+08:00

EDC mihatag ug Rural health building ngadto sa lungsod sa Valencia

DUMAGUETE CITY, Jan. 18 (PIA) Ang bag-o lang napatukod nga Rural Health Building pormal nga itugyan sa Energy Development Corporation (EDC) ngadto sa lokal nga kagamhanan sa siyudad sa Valencia ugmang adlawa, Enero 19 sa alas 9 sa buntag.

Si EDC Chairman Emeritus Oscar Lopez maoy mangulo sa turn-over ceremony uban nila ni Richard Tantoco ug Dwight Maxino, ang presidente ug bise president sa Southern Negros Geothermal Power (SNGP) sa buhatan sa EDC ug pagadawaton sa mayot sa lungsod Enrique Gonzalez.

Ang mga residente sa Valencia nanghinaot nga makabenepisyo sa bag-ong tukod nga Rural Health Buiding sa ilang lungsod nga gituohang maghatod ug mas maayong serbisyo sa mga katawhan.

Si Mayor Enrique Gonzales misaad usab ngadto sa mga residente gikan sa mga kabarangayan nga aduna nay igong suplay sa health care services sa lungsod tungod sa niining bag-ong kalamboan nga gihatod sa buhatan sa EDC.

Ang maong building nahimutang sa usa ka 742 sq meter floor area ug mikabat sa P20M ang kantidad sa pagpatukod niini.

Ang kagamhanan sa Valencia mao ang mopatuman ug magmintinar sa operasyon sa maong building sumala sa natala sa gipirmahang memorandum of agreement sa duha ka mga habig.

Ubos sa corporate social responsibility nga programa, ang EDC mipatukod sa maong proyekto aron mapalambo ang kalidad sa health and medical services sa mga lokal nga komunidad.

Gawas niini, ang EDC milangkob sa uban pang mga development projects sa lunsod sama sa mga proyekto sa esukasyon, panarbaho ug uban pa. (mbcn/PIA & CTU/Maryknoll B. Lague )

===========

Kapin 100 ka tonilada nga basura nahipos human sa Sinulog

CEBU CITY, January 18 (PIA) --- Gibana-banang mihipos ug kapin 100 ka tonilada nga basura ang Department of Public Service (DPS) niadtong Dominggo, Enero 15 atol sa gipahigayon nga Sinulog dinhi sa Sugbu.

Kini gikompirmar ni DPS Chief, Engr. Dionesio Gualiza atol sa iyang pamahayag. Mikabat sa 113 ka tonilada nga basura ang nahipos atol sa pista ni Sr. Sto. Niño ug gidala kini ngadto sa usa ka pribadong landfill nga nahimutang sa Consolacion, Cebu.

Dakong kalisod matud pa ang pagpanghipos sa mga basura human sa kasaulogan tungod kay kadaghanan sa katawhan midumong sa mga kadalanan sa siyudad human milantaw sa gipahigayong Sinulog Grand Parade competition.

Ang Colon Street, Fuente Osmeña ug Mango Square nga maoy labing gidagsa sa mga bisita maoy mga lugar nga adunay labing daghang nakolekta nga mga basura, dugang pa ni Gulaiza.

Uban sa pakigtambayayong sa City and Environment Sanitation Team ug mga metro aids sa siyudad, ang DPS nagsugod pagpanghipos sa alas 2:00 sa kadlawn ug natapos sa alas 7:00 sa buntag.

Si Cebu City Mayor Michael Rama misaad nga mohatag ug tag-usa ka sakong bugas ngadto sa mga kawani sa DPS, CESET, CITOM, SPEED ug mga metro aid sa siyudad nga mitagana sa ilang serbisyo sa pagpanglimpyo sa mga kadalanan human sa gipahigayon nga dakong kalihokan sa siyudad. (mbcn/PIA & CTU/Maryknoll B. Lague)

===========

Siquijor mitagana ug P3M nga hinabang ngadto sa mga biktima sa Sendong

SIQUIJOR, Jan 18 (PIA) – Isip pasalamat sa pag-iway sa ilang probinsya sa katalagman nga dala sa bagyong Sendong, ang probinsyal nga kagamhanan sa Siquijor mitagana ug P3M nga kantidad gikan sa ilang quick respond calamity nga pondo alang sa mga biktima sa bagyo gikan sa dakbayan sa Dumaguete, Iligan ug Cagayan de Oro.

Kini base sa pamahayag ni Provincial Governor Orlando A. Fua atol sa gipahigayong labing unang Provincial Disaster Risk Reduction Management Council (PDRRMC) meeting kagahapon sa Sangguniang Panlalawigan Hall sa probinsya.

Matud ni Fua, ang buhatan sa Department of Budget of Management (DBM) miaprobar sa paghatag sa P2 milyon nga pondo ngadto sa siyudad sa Iligan ug ang laing duha ka P500,000 ngadto sa dakbayan sa Cagayan de Oro ug Dumaguete.

Dugang sa gobernador nga adunay laing P3M nga gitagana ang probinsya alang sa paghatag ug dugang kabtangan sa PDRRMC alang sa mas epektibong lihok sama sa paginstolar ug mga redio repeaters nga magdugtong sa matag munisipalidad gamit ang mga portable transceivers.

Ang probinsya mopalit usab ug dugang mga speedboats nga magdala sa mga pasyente gikan sa Siquijor ngadto sa mga tambalanan sa Dumaguete. Gamiton usab ang mga speedboats isip mga patrol boats sa inadlaw-adlaw nga pagbantay sa mga kadagatan sa probinsya.

Nanghinaot ang gobernador sa padayong paghatag ug proteksyon sa labawng makagagahom sa ilang probinsya apan misaad sa mas andam ug preparado nga probinsya sa bisan unsang kalamidad nga ilang sagubangon sa umaabot nga panahon. (mbcn/PIA & CTU/Maryknoll B. Lague)

==========

Sitios sa Bais City aduna nay suplay sa kuryente

DUMAGUETE CITY, Jan. 18 (PIA) --- Dugang tulo ka mga sitios sa kabukirang bahin sa siyudad sa Bais, Negros Oriental ang nahatagan na ug suplay sa kuryente sa wa pa matapos ang tuig 2011.

Kini ang gibutyag ni Engr. Patricio Miaco, ang nangulo sa Electrical Division Engineer’s Office sa dakbayan.

Matud pa, mokabat sa P3.5M nga pondo sa tuig 2011 ang gitagana alang sa maong proyekto.

Bisan pa man kadaghanan nga sa mga barangay sa siyudad aduna nay elektrisidad, dul-an sa 60% sa mga sitio sa siyudad ang wala pa makapahimulos niini.

Dugang ni Engr. Miaco, ang lokal nga kagamhanan mitagana ug dul-an P2 ka milyon alang sa pag-instalar ug pagpang-apod-apod sa mga linya matag kilometro gikan sa poblacion hangtod sa matag sitio.

Kadagahanan matud pa niining mga sitio nahimutang sa bukirang bahin gikan sa poblacion.

Ang siyudad sa Bais nagsalig lamang sa ilang tinuig nga pondo alang sa paghatag ug kuryente matag kabalayan sa ilang dakbayan.

Kahinumdoman ning bag-o lang, si Pres. Benigno S. Aquino III mitagana ug kantidad nga P1.1 billion ngadto sa National Electrification Administration (NEA) aron paghatag ug linya sa elektrisidad sa mga bukirang bahin sa mga probinsya lukop nasud. (mbcn/PIA & CTU/Maryknoll B. Lague)

==============

Libreng computer training ipahigayon sa dakbayan sa Dumaguete

CEBU CITY, Jan. 18 (PIA) -- Ang Philippine National Information Technology Standards Foundation, Inc. (PhilNITS) mopahigayon sa usa ka IT Passport Examination alang sa mga tinun-an sa dakbayan sa Dumaguete karong umaabot Enero 19.

Ang mga tinun-an gikan sa mga tunghaan ug unibersidad sa NegOr ug University of San Carlos dinhi sa siyudad sa Sugbu ang gikatakdang molangkob sa maong seminar.

Matud ni Dae Habalo sa Foundation University, kini usa ka tunga sa adlaw nga kalihokan nga ipahigayon sugod 1:30 hangtod alas 5:00 sa hapon didto sa LG Sinco IT Audio Visual Rooms.

Kining maong seminar usa sa mga gipanginahanglan sa mga tinun-an nga gikatakdang mokuha sa IT Passport examination karong Abril 29 nga ipahigayon usab sa Foundation University.

Gibutyag ni Ma Corazon Akol, presidente sa PhilNITS nga kining maong kalihokan gituohang magpromot sa ilang gipatuman nga IT Certification Project nga gipanguluhan sa Information Technology Promotions Agency (IPA) sa nasud sa Japan.

Gawas kang Akol, ang seminar pagalangkoban ni Mr. Shinichiro Kato usa ka JODC expert ug ni Mr. Alfran Keith Consing. (mbcn/PIA-7 & CTU/Maryknoll B. Lague)

==========

DILG Siquijor miduso alang sa pagmugna sa prov’l committee on anti-trafficking, VAWC

by Rizalie Anding Calibo

SIQUIJOR, Jan. 17 (PIA) – Giduso sa Department of the Interior and Local Government (DILG) sa Siquijor ang paghimo ug Provincial Committee on Anti-Trafficking and Violence Against Women and their Children (PCAT-VAWC) sigon sa hiniusang Memorandum Circular sa DILG, Department of Social Welfare and Development (DSWD) ug Department of Justice (DOJ).

Gi-isyu ang Memo Circular aron epektibong mapatuman ang Republic Act No. 9208 kon “Anti-Trafficking in Persons Act of 2003” ug Republic Act No. 9262 usab gitawag ug “Anti-Violence Against Women and their Children Act of 2004.”

Ang kagamhanan sa probinsiya milatid ug Executive Order pagmugna sa PCAT-VAWC nga pagapanguluhan sa gobernador uban sa provincial social welfare and development officer isip co-chairperson.

Mga miyembro sa komitiba mao ang provincial planning and development coordinator, provincial health officer, Sangguniang Panlalawigan chairperson of the Committee on Women, Children and Family, public employment and services officer (PESO), provincial schools division superintendent, Civil Service Commission field officer/director, provincial prosecutor, provincial directors sa DILG, Philippine National Police (PNP) ug mga representate sa non-government organization gikan sa sector sa kababayen-an, kabataan, overseas Filipino workers ug Interfaith representative.

Sa maong tagik, ang PCAT-VAWC mahimo ug mga palisiya ug programa aron magproteher sa kababayen-an ug kabataan nga biktima sa trafficking ug panamastamas sama sa pagpanday ug mga ordinansa ug resolusyon.

Kini usab magmugna ug moestablisar ug sistema sa pagbantay, pag-imibistigar ug pagluwas aron pagsiguro sa maayong koordinasyon, ingon man paghimo ug information education ug advocacy campaign batok sa pagpalusot sa katawhan kon trafficking in persons ug VAWC.

Usab kini magmonitor og molantaw sa hugot nga pag-implementar sa RA 9208, RA 9262 ug uban pang balaod kalabot sa pagproteher sa kababayen-an ug mga kabataan ug sa Inter-agency Council for Anti-Traffiking (IACAT) Inter-Agency Council for VAWc (IACVAWC). (mbcn/ra/PIA-Siquijor)

=========

Dul-an 3M milangkob sa pagselebrar sa pista Señor Sto. Niño

CEBU CITY, Jan. 17 (PIA) --- Gibana-banang mokabat sa dul-an tulo ka milyon ka mga deboto ug turista ang milangkob sa selebrasyon sa pista ni Sr. Santo Niño niadtong Dominggo, sigun ni Cebu City Police Office chief Sr. Supt. Melvin Ramon Buenafe.

Matud ni Buenafe, ang maayong dagan sa panahon u gang presensya sa daghang mga artista ug personalidad maoy mga gituohang hinungdan sa paghugop sa katawhan atol kalihokan.

Dugang pa, mokabat sa dul-an usa ka milyon ka tawo ang midagsa sa kadalanan aron sa paglantaw sa street dancing performance sa nagkalain-laing contingent ug laing duha ka milyon ang midagsa sa uban pang lugar s asiyudad sama sa mga malls, sa Cebu City Sports Center ug sa Basilica del Sto. Niño.

“Medyo pareho lang last year ang tao and thanks sa ulan kasi hindi naging mainit ang ulo ng mga tao,” matud pa ni Buenafe.

Base sa gipahigayong ebalwasyon sa kapulisan, malampuson ug malinawon ang gipahigayong Sinulog karong tuiga.

Mipadangat usab si Buenafe sa iyang pasalamat ngadto sa ubang buhatan nga milangkob aron mapatuman ang kahapsay sa siyudad aron sa pag-aghat sa mga torista sa pagbalik pagbisita dinhi sa dakbayan.

“We have to protect the reputation of the Sinulog para hindi matakot ang tourists na bumalik dito,” matud pa ni Buenafe. (mbcn/PIA-7 & Maryknoll B. Lague/ CTU)

==========

Mayor sa Sugbu mideklara nga malampuson ang Sinulog 2012

by: Maryknoll B. Lague

CEBU CITY, January 17 (PIA) – Ang mayor sa siyudad sa Sugbu Michael Rama mideklarar sa Sinulog 2012 isip malapusong kalihokan ug mipadangat sa iyang pasalamat ngadto sa Balaang Bata Senyor Sto. Niño sa maayong kahimtang sa panahon atol sa tinuig nga selebrasyon sa Sinulog mardi gras dinhi sa Sugbu.

Ang buhatan sa PAG-ASA sayong mipaabot sa ilang abiso nga mamahimong adunay mahitabong pag-uwan atol sa hinapos nga bahin sa semana, apan kagahapong adlawa aduna lamang nahitabong gamayng taligsik atol sa kahaponon.

Mipadangat usab sa iyang pasalamat ang mayor ngadto sa Sinulog Foundation, Inc., Philippine National Police, AFP-Central Command, lain-laing tunghaan ug unibersidad , mga lokal nga ahensya sa gobyerno ug uban pang mga pribadong indibidwal nga milangkob alang sa kalampusan sa labing dakong tinuig nga kalihokan sa siyudad.

Matud ni Rama ang kalampusan sa Sinulog dili lamang dungog sa kagamhanan sa siyudad kundi lakip na sa tanang mga katawhan sa Sugbu. Dugang sa mayor nga ang maong selebrasyon dili lamang alang sa kultura ug turismo sa Sugbu kundili tumong niini ang paghatag ug pasalamat ug pagmahal ngadto kang Senyor Sto. Niño.

Mikabat sa 135 ka mga contingent ang milangkob atol sa grand parade samtang ang programa milanat hangtod alas 9 :00 sa gabie pinaagi sa usa ka labing nindot nga fireworks display.

Gawas sa pagpakita sa mga kultura sa siyudad, gipakita usab sa kalihokan ang mga nagkadaiyang talento sa mga Cebuano sa natad sa arts, fashion, business ug uban pa.

Ang mga Cebu Bus Operators usab mitagana sa 30 ka mga bus kagabii aron paghatag ug sakyanan sa mga residente, torista ug bisita sa siyudad ngadto sa ilang mga destinasyon.

Gawas sa 12 ka mga insidente sa pagpanglabni, ang Cebu City Police miasoy nga walay natala nga dagkong insidente ang kinatibuk-ang kalihokan sa Sinulog 2012.(mbcn/mbl/PIA-7 & CTU)

2012-01-15T09:18:00.001+08:00

Pwersa sa kapulisan sa siyudad sa Sugbo gihingusgan ang pagpangandam

sa posibilidad nga mahitabo ang stampede atol sa Sinulog

CEBU CITY January 14 (PIA) --- Human masiguro sa publiko ang negatibong hulga sa terorista ning umaabot nga kasaulogan sa Sinulog ang laing gitotukan karon sa mga kapulisan mao ang posibilidad nga aduna’y stampede nga mahitabo gumikan kay napanglantawan ang bagang duot unya sa katawhan nga motambong ug mosaksi sa Sinulog.

Pero si Cebu City City Police Director, PSSUPT Melvin Ramon Buenafe nagkanayon nga ilang himoon ang tanan nga pagpangandam bahin niini dungan sa pasalig sa 100 porsyento nga presensya sa mga kapulisan sa mga dapit nga sagad magpundok ang bagang duot sa katawhan.

Matud pa usab ni Buenafe nga ila na usab nga gipangayo ang abag sa mga unibersidad ug kolehiyo pinaagi sa pagpadala ug mga tinun-an ingon man mga trainees nga magsilbing crowd control ug giya sa mga tawo aron ang makontrolar ang gidaghanon sa mga tawo nga magpundo sa usa ka lugar hilabi na gayod sa mga kritikal nga dapit.

Ang mga dapit nga sagad magpunsisok ang bagang duot sa katawhan maglakip sa Cebu City Sports Complex, diin mopasundayag ang mga partisipante sa Sinulog.

Matud pa ni Buenafe nga daghan unya nga mga kapulisan ang idestino sa grand stand ug iya na usab nga gitagaan og kamanduan ang madestino unya dinhi nga walay tugotan nga magpundo sa atubangan nga railings lakip na usab ang agianan padulong sa mga bleachers sa taas nga bahin sa complex.

Aduna usa’y ipamutang nga mga PNP hotlines ug mga emergency hotlines sa mga lugar nga again sa rota sa Sinulog aron ang mga tawo dali ra unya nga makatawag og panabang panahon sa mga aksidente ug uban pa nga mga panghitabo.

Sa sayo pa ang pwersa sa mga kapulisan sa siyudad sa Sugbo nipahigayon og dry deployment sa ilang mga kawani nga madestino sa mga sections nga maagian sa rota sa Sinulog ug kuyog sa uban nga mga opisyales sa kapulisan gipahigayon usab ang pagsubay sa mga rota sa Sinulog.

Ug uban nga mga buhatan sa kapulisan sa probinsya sa Sugbo nipasalig usab sa ilang suporta aron pagsiguro kahapsay og kalinaw atol unya sa kasaulogan sa Sinulog hilabi na dinhi sa siyudad sa Sugbo. (Translated into Cebuano by Amor Saludar/PIA-CEBU)

===========

Bukirang barangay sa Guihulngan aduna nay kaugalingong potable water system

DUMAGUETE CITY, Jan. 13 (PIA) --- Usa sa mga bukirang barangay sa lungsod sa Guihulngan ang gitakdang aduna nay umaabot nga potable drinking water system human misaad ang gobernador sa NegOr Roel Degamo sa pagbubo ug pondo alang sa limpyong tubig sa lugar nga mamahimong magamit sa mga residente.

Si Gov. Degamo misaad atubangan sa mga opisyales sa Barangay Hibaiyo, Guihulngan atol sa gipahigayong pagbisita niini sa lugar alang sa usa ka barangay assembly uban ni Guihulngan Mayor Ernesto Reyes.

Ang mga opisyales sa barangay maoy mipaabot sa ilang hangyo ngadto sa kagamhanan sa probinsya sa ilang panginahanglan sa pagpatukod ug usa ka water system project sa ilang barangay, matud ni Capitol Information Officer Adrian Sedillo.

Gidugang ni Sedillo nga ang gobernador migahin na ug podo nga mokabat sa tunga ka milyon ka pesos alang sa maong proyekto.

Dugang sa mga proyekto nga gisaad sa gobernador mao ang pondo alang sa pagpahuman sa kasamtangang gipatukod nga road pavement ug multi-purpose building sa barangay.

Gibutyag ni Sedillo nga atol sa nahitbaog pagbisita, nakita sa gobernador ang panginahanglan sa mga nahisgutang proyekto ngadto sa lugar lakip na ang multi-purpose building nga maoy magsilbing venue atol sa mga ipahigayong barangya assembly.

Ang gobernador, atol sa maong assembly mibutyag usab nga lakip ang lungsod sa Guihulngan sa mga lokal nga kagamhanan nga prayoridad sa probinsya sa pagpatuman ug mga heath and infrastructure projects karong tuiga. (PIA-7 & CTU/Maryknoll B. Lague CTU)

===========

PPDO mipagawas sa listahan sa mga nag-unang flood prone areas sa Sugbu

CEBU CITY, Jan.13 (PIA) --- Ang buhatan sa Provincial Planning Development Office (PPDO) mipagawas sa ilang listahan sa mga gituohang mga nag-unang flood-prone areas ug landslide dinhi sa kinatibuk-ang probinsya sa Sugbu.

Nalakip sa listahan sa buhatan mao ang mga lungsod sa Pinamungajan, Aloguinsan, Compostela, Liloan, Consolacion, Danao, Carmen, Catmon, Naga ug Minglanilla.

Matud ni PPDO Coordinator engineer Adolfo Quiroga, usa ka mapa nga gihulma sa ilang buhatan uban sa pakigtambayayong sa Mines and Geosciences Bureau (MGB) ang gikatakdang ipang-apod-apod sa mga nahisgutang mga lungsod.

Dugang ni Quiroga, kasagaran sa mga nalakip sa ilang listahan nahimutang sa ubos nga bahin busa posibleng dali kining mabahaan.

Ang mga lungsod nga anaa sa bukirang bahin sa Sugbu nga gilangkoban sa Sogod, Asturias, Balamban, Toledo, Dalaguete, Alcoy, Naga, Sibonga, Boljoon ug San Fernando nahilakip usab sa listahan sa mga landslide prone sites.

Ang mapa nga ipang-apod-apod sa ilang buhatan adunay mga impormasyon nga mamahimong giya sa mga opisyales sa pagpatuman ug mga pagpangandam sa ilang matag lokalidad.(mbcn/PIA-7 & CTU/Maryknoll B. Lague)

===========

DSWD-7 migahin ug P92M nga pondo alang sa mga biktima sa baha sa NegOr

CEBU CITY, January 13 (PIA) --- Ang buhatan sa Department of Social Welfare and Development (DSWD-7) dinhi sa Central Visayas migahin ug P92M nga kantidad alang sa mga pamilyang biktima sa bagyong Sendong.

Matud ni DSWD-7 regional director Ma. Evelyn Macapobre, mokabat sa kapin 7,000 ka mga pamilya nga apektado sa nahitabong baha gikan sa kinatibuk-ang probinsya sa NegOr ang mahatagan ug pinuy-anan ubos sa core shelters program sa DSWD.

Dugang ni Macapobre, ang mga opisyales sa mga munisipalidad sa NegOr nga gilangkoban sa Bacong, Amlan, Mabinay, Pamplona, San Jose, Sibulan, Siaton, Valencia ug mga siyudad sa Tanjay ug Dumaguete kasamtangang mipahiluna sa mga gikinahanglan rekisitos alang sa mas daling pag-abot sa mga gikinahanglan nga pondo matag lokalidad alang sa maong proyekto.

Base sa datos sa buhatan, mokabat sa 1,398 ka mga pamilya nga nawad-an sa ilang panimalay ang makadawat ug P70T matag usa alang sa pagpatukod sa ilang tagsa-tagsa ka mga panimalay samtang ang 6,356 ang makadawat ug P5,000 nga kantidad matag usa alang sa pagpamalit ug mga contstrution materials nga maggamit sa pagtarong sa mga naguba nga pinuy-anan, kini ubos sa Emergency Shelter Assistance (ESA) nga programa sa DSWD.

Sa pagkakaron, adunay kapin sa 400 ka mga pamilya ang kasamtangang nagpuyo gihapon sa lima ka mga evacuation centers nga gitagana sa kagamhanan sa siyudad sa Dumaguete lakip na usab sa mga lungsod sa Valencia ug Sibulan kung diin sila padayong nagdawat ug mga hinabang gikan sa lain-laing ahensya sa gobyerno ug uban pang mga pribadong grupo. (PIA-7 & CTU/Maryknoll B. Lague)

2012-01-13T14:44:00.003+08:00

Sibulan nakadawat ug ayuda gikan sa probinisya sa Sugbu

DUMAGUETE CITY, Jan. 13 (PIA) – Nakadawat gikan sa lalawigan sa Sugbu ang kagamhanan sa Sibulan ug hinabang pinansyal nga nagkantidad ug P570,000 alang sa mga biktima katalagman.

Si Cebu Governor Gwen Garcia mitunol mismo sa hinabang ngadto kang Bise Mayor Antonio Renacia ug Municipal Disaster Risk and Reduction Management Operations Head Concepcion Rosales niadtong Enero 10, 2012.

Ang gobernador mibisita sa maong lungsod ug uban pang lokal nga kagamhanan sa Negros Oriental nga naigo sa kalamidad uban sa pipila ka mga mayores sa lalawigan sa Sugbu.

Si Bise Mayor Renacia mipasalamat kang Gov. Garcia sa iyang donasyon nga makatabang alang sa mga bitima sa Bagyong Sendong sa Sibulan ingon man alang sa pag-ayo sa mga nagubang imprasraktura sa maong lungsod.

Sumala ni Rosales, ang lungsod ubos pa gihapon sa “state of calamity” ug magpadayon kini hangtod nga mahiluna kadtong mga pamilyang nawad-an ug panimalay.

Ang kagamhanan kasamtangang nag-atiman sa pito ka mga pamilyang nawad-an ug panimalay ug kapanginabuhian.

Dili pa lamang dugay, mipasa ang Sibulan Municipal Disaster Risk Reduction Management Council (MDRRMC) ug resolusyon paghangyo sa Sangguniang Bayan sa pagbalaod sa ordinansa nga nagdili pagtukod ug kabalayan sulod sa 20 ka metros gikan sa tampi kon ‘riverbanks.’

“Kini usab subay sa probisyon sa Water Code of the Philippines,” matud pa ni Rosales.

Sa kasamtangan, ang konseho mitala ug 12 ka mga patay gumikan sa bagyo ug 280 ka kabalayan nga hilabihang nagun-ob kon ‘totally damaged’ ug 322 ka mga kabalayan nga ‘partially damaged ‘.

Gibanabana ni Rosales nga ang kadaut usab sa mga imprastratura sa gobyerno mikabat sa P10 million.

Ang labing naigong barangay mao ang Tubtubon.

Uban pang mga barangay nga naapektohan usab mao ang: Looc, Poblacion, Ajong, Bolocboloc, Cangmating, Maslog, Magatas, Maningcao, San Antonio, Tubigon, Balugo, Calabnugan ug Agan-an.

“Ang konseho padayon pa sa ilang buluhaton pag-ayo sa mga nagubang dapit, pag monitor sa kondisyon sa panahon, ingon man maghimo ug mga plano alang sa dinalang tubag sa kalamidad kon ‘quick disaster response,” dugang pa ni Rosales. (translated into Cebuano by Rizalie Anding Calibo/PIA Siquijor)

===========

Cebuano News: Militar midonar ug mga bisti sa mga nabiktima sa Sendong sa Tanjay

DUMAGUETE CITY, Jan. 13 (PIA) – Labaw sa 5,000 ka pamilya nga naigo sa bagyong Sendong sa Tanjay City ang nakadawat ug mga sapot hinabang gikan sa 302 Brigade, Philippine Army.

Sumala ni Public Information Officer, Captain Anacito Naz, ang Brigada midonar ug unom ka sakong mga sapot alang sa siyudad sa Tanjay.

Ang maong mga bisti gitunol ngadto kang Mayor Lawrence Teves uban sa City Social Welfare and Development Officer sa City Hall.

Misuma sa 5,293 ka mga pamilya gikan sa 18 ka mga barangay sa Tanjay ang naapektohan sa Sendong nga sumala pa mihatag ug kadaot sa 380 ka ektaryang fishponds, 381 ka kaumahan, 280 ka ektarayang kahumayan ug 18 ka ektaryang kamaisan.

Matud ni Brigade Commander Col. Francisco Patrimonio ang 302 Brigade ug ang mga sakop niini padayong nangita ug paagi sa pagtabang sa mga apektadong pamilya.

Siya miingon nga ang mga army troopers, CAFGUs ug reservists personnel mihatag sa ilang kusog ug ayuda sa transportasyon ngadto sa mga ahensiya sa gobyerno, non-government organizations, local chief executives ug uban pang nalambigit sa relief operations ngadto sa mga biktima sa Sendong.

Kanhi, labaw sa 50 ka military personnel, CAFGUs ug reservists mitabang pagputos sa mga nagkalain-laing relief goods sa ABS-CBN Cebu didto sa Silliman University Gymnasium sa Dumaguete City. (translated into Cebuano by Rizalie Anding Calibo/PIA-Siquijor)

==========

Leptospirosis natala sa siyudad sa Dumaguete

DUMAGUETE CITY, Jan. 13 (PIA) – Tulo ka mga kaso sa Leptospirosis gumikan sa baha nga gidala sa bagyong Sendong ang natala sa siyudad sa Sumaguete, Negros Oriental.

Kini gikumpirmar ni City Health Officer Dr. Ma. Sarah Talla ug miingon nga ang mga biktima naggikan sa mga lugar nga labing apektado sa bagyo niadtong Disyembre 17, 2011.

Sa usa ka pamahayag nga giluwatan sa Information Office sa siyudad, ang tulo ka mga pasyente nga karon kasamtangan pang gipaubos sa pag-atiman sa ospital, mga residente sa Poblacion 8, Barangay. Cadawinonan ug Barangay Taclobo.

Ang Leptospirosis usa ka sakit nga makuha gikan sa Leptospirosis bacteria nga makuha gikan sa mga ihi o hugaw sa ilaga.

Ang mga sintomas niining maong sakit naglangkob sa taas nga hilanat, labad sa ulo, pagpamuwa sa mata, pagpanakit sa kalawasan ug pagpangyellow sa mga panit sa tibuok kalawasan.

Uban pang mga sintomas mao ang low blood pressure o hypotension, mabugnaw nga pamanit, kalisod sa pagginhawa, ubos nga gidaghanon sa ihi ug mga pagdugo o bleeding.

Ang kagamhanan sa siyudadsa Dumaguete karon kasamtangang nagpahigayon ug mga information campaign kalabot sa paglikay, pagtambal ug pagkontrolar sa sakit nga leptospirosis aron paglikay sa pagsaka sa gidaghanon sa mga kaso niini sa probinsya, matud pa ni City Information Officer Stevel Gabriel.

Giabisohan usab ni Talla ang publiko nga dili angayang pasagdan kining maong sakit tungod kay mamahimong makabsan sa kinabuhi ang biktima niini kung dili madali pagtratar sa tambalanan.

Lakip sa mga mamahimong buhaton aron likayan ang sakit nga Leptospirosis naglangkob sa paggamit ug limpyong boots ug gloves, paglikay sa mga sudlanan nga anaay hugaw nga tubig, pagpamatay sa mga ilaga nga nagdala sa maong bacteria, pagmintinar sa kalimpyo sa palibot ug paglikay sa paglabay ug mga sobrang pagkaon nga maoy modani sa mga ilaga. (PIA-7 & CTU/Maryknoll B. Lague)

=========

NGO mag-obserbar usab ug Sinug

CEBU CITY, Jan 12 (PIA) – Usa ka pribadong organisasyon nga nagbase dinhi sa Sugbu ang miawhag sa publiko sa paglangkob sa ilang ipahigayong selebrasyon karong Enero 16 kung diin ilang ipakita ang tradisyonal nga pamaagi sa pagsayaw ug pagselebrar sa “Sinug” atol sa kapistahan ni Señor Sto. Niño.

Ang Ramon Aboitiz Foundatin mopahigayon sa usa ka forum atol sa maong adlaw kalabot sa tradisyonal nga selebrasyon sa Sinulog nga adunay titulo nga “Sinug or Sinulog? A dance offering for Sto. Niño” nga ipahigayon sa Bryant George Plenary Hall, Eduardo Aboitiz Development Studies Center, Lopez Jaena St., dinhi sa siyudad sa Sugbu.

Ang dinapit alang sa maong forum mao si Dr. Erlinda Alburo, usa ka inilang Cebuano historian ug gikatakdang mohisgot kalabot sa saktong paggamit sa pulong nga sinug o sinulog.

Sa samang adlaw, sa alas 3 sa hapon ipahigayon usab ang tinuig nga pasundayag nga “ Sinug sa Casa Gorordo” nga pagalangkoban sa pagsayaw ni Estelita “Nang Titang” Diola uban sa iyang mga kaubanan.

Nang Titang, 87, usa ka sumasayaw sa tradisyunal nga sinug base sa orihinal nga tukar niini.

Ang mga mananayaw magasul-ob ug mga sapot nga magpakita sa mga orihinal nga senina sa mga Cebuano atol sa panahon sa mga Espanyol.

Ang Sinug sa Casa Gorordo usa ka tradisyon sa pamilya Gorordo ug gipadayon sa RAFI isip kabahin sa ilang pasalig sa pagtunhay sa mga orihinal nga tradisyon sa Sugbu.

Buot sa RAFI nga kining duha ka mga kalihokan karong Lunes maghatag ug dugang kaalam sa mga Cebuano kalabot sa mga kultura ug historya sa atong komunidad atol sa kasaysayan.

Usa usab ka exhibit kalabot sa ‘sinug’ ang gipahigayon sa prayer room sa Casa Gorordo sugod niadtong Enero 10 hangtod karong Enero 31. Ang maong exhibit nagpakita usab sa mga kaagi ug istorya sa Sinulog una kini nahimong pinakadakong festival sa nasud. (mbcn/PIA-7/Maryknoll B. Lague)

===========

DOH-7 magbutang ug mga medical teams sa kadalanan atol sa Sinulog parade

CEBU CITY, January 13 (PIA) --- Ang buhatan sa Department of Health (DOH-7) sa Central Visayas gikatakdang magbutang ug kapin sa 22 ka mga medical teams sa lain-laing lugar nga sakop sa rota sa prosisyon sa Sinulog ugmang adlawa lakip na usab atol sa Grand Sinulog Celebration karong Enero 15, Dominggo.

Si Health Emergency Management program coordinator Dr. Expedito Medalla, namahayag nga matag medical team adunay doctor, nurse, paramedics, communicator ug driver. Adunay kapin sa 100 ka mga tawo ang molangkob niini.

Gawas sa mga medical booths, ang DOH 7 nakig-alayon usab sa Cebu Medical Society ug uban pang mga pribado ug publikong tambalanan sa pagmonitor sa mga sitwasyon ug emergency atol sa pagsaulog sa kapistahan ni Sr. Sto Niño.

Atol sa gipahigayong AGIO-7 Forum kagahapon didto sa buhatan sa DOH 7, si Medalla mihangyo sa katawhan ug mga deboto sa pag-amping ug pagmabinantayon sa ilang mga kahimtang sa panglawas atol sa ilang pagpanuroy sa adlaw sa selebrasyon.

Miawhag usab siya sa pagdala ug mga pagkaon, tubig, juice, medisina ug uban pang mga panginahanglan sa paglikay sa mga posibleng problema nga masugatan atol nianang adlawa.

Sa laing bahin, ang Office of Civil Defense (OCD) maoy nangulo sa sa gitukod nga emergency responding nga gilangkoban sa mga buhatan sa Philippine Red Cross, Bureau of Fire Protection (BFP), Philippine National Police (PNP), Emergency Rescue Unit Foundation (ERUF), Basak Pardo Emergency Response ug uban pang mga medical groups.

Gipahibalo usab ni Medalla nga ang ilang buhatan nagpadala ug mga suwat hangyo ngadto sa tanang tambalanan sa siyudad sa pagpatuman sa code white sugod ugmang adlawa, January 14 hangtod 15 aron andam kini sa bisan unsa mang sitwasyon nga masugatan atol sa Sinulog.

Ang DOH-7 mipahibalo usab nga atol sa Sinulog sa miaging tuig, walay dagkong panghitabo ang natala ug nanghinaot ang ilang buhatan nga mamamimong hapsay ug luwas ang mahitabong selebrasyon karong tuiga.(mbcn/PIA-7/Maryknoll B. Lague)

2012-01-12T14:34:00.002+08:00

Nangaguba'ng tulay ug dalan sa NegOr mikabat nagdto sa P1.2B

(Gobernador nangita'g pundo alang niini)

DUMAGUETE CITY, Jan. 12 (PIA) --- Si Negros Oriental Gov. Roel Degamo namahayag ang ang iyang kagamahan kasamtangang nangita ug igong pondo gikan sa nasudnong kagamhanan alang sa pagpaayo sa mga nagubang mga infrastructure sa probinsya tungod sa grabeng pagbaha resulta sa pag-igo sa bagyong Sendong sa miaging buwan.

Gibana-banang mokabat sa P1.2 ka bilyon ang gikinahanglan sa probinsya aron sa hingpit nga pagtarong sa mga kadalanan, taytayan, mga tunghaan, irigasyon ug uban pa.

Ang gobernador matud pa bag-o lang misumiti sa iyang suwat hangyo uban sa mga datos ug report ngadto sa buhatan sa Office of Civil Defense (OCD).

Matud ni Gov. Degamo nga ang ilang calamity fund dili igong kantidad alang sa pagpatukod ug mga bag-ong proyekto sa infra sa probinsya puli sa mga nangaguba ug nangahanaw na nga mga pasilidad.

Gipaabot usab sa gobernador ang daling pagtubag sa kagamhanan kalabot sa iyang hangyo alang usab sa kaayohan sa iyang mga residente sa NegOr.

Kahinumdoman nga ang pag-igo sa bagyong Sendong sa probinsya sa uwahing bahin sa miaging tuig miresulta sa paglapaw sa tubig sa mga sapa sa Okoy, Banica ug Tanjay hinungdan usab sa pagkabanlas sa mga panimalay sa mga lumulopyo sa probinsya lakip na ang mga infrastratura sa probinsya.

Sa pagkakaron, migahin na ug P8 ka milyon nga kantidad ang lokal nga kagamhanan alang sa rehabilitasyon sa mga dagkong kasapa-an sa probinsya ug laing P5 ka milyon alang usab sa uban pang mga proyekto sama sa pagpatukod ug mga gabion isip mga flood control dikes aron paglikay sa subling pagkahitabo sa dakong baha. (PIA-7 & CTU/mbcn/Maryknoll B. Lague)

==========

TOSP mopahigayon ug Youth Hours sa Sugbu ug Dumaguete

CEBU CITY, Jan. 12 (PIA) -- Ang The Outstanding Students of the Philippines- Alumni Community (TOSP-AC) sa Central Visayas gikatakdang mopahigayonug "Youth Hours" (YH) ngakalihokan karong umaabot nga Enero 28 sa dakbayan sa Dumaguete lakip na usab dinhi sa siyudad sa Sugbu.

Matud ni TOSP regional representative Rolando C. Villamero Jr. kining maong kalihokan buot motigom sa mga student leaders ug school administrators gikan sa lain-laing Higher Education Institutions (HEIs) sa Rehiyon 7 sa duha ka managlahing dapit.

Ang mga sumasalmot sa kalihokan nga naggikan sa mga probinsya sa Bohol, Siquijor ug Negros Oriental gikatakdang motambong sa YH nga ipahigayon sa dakbayan sa Dumaguete samtang ang mga mosalmot gikan sa lain-laing dapit sa Sugbu gikatakdang motambong sa YH nga ipahigayon sa tunghaan sa University of San Carlos (USC) dinhi sa siyudad sa Sugbu, dugang pa ni Villamero.

Ang "Youth Hours" usa ka tinuig nga youth-formation workshop subay sa inilang three pillars sa sa TOSP nga mga programa nga gilangkoban sa: academic excellence, leadership, ug social responsibility.

Matag partisipante gikatakdang mupaubos niining upat ka nagkalain-laing workshop: academic and professional excellence track, leadership track, social responsibility track, ug school administrators’ track.

Gibutyag ni Villamero nga kining kalihokan nagsilbi usab isip pagbukas sa TOSP 2012, usa sa ilang mga tinuig nga programa nga adunay tumong sa pagpangita sa mga labing banggiitang tinun-an gikan sa bisan-asang tunghaan lukop nasud.

Ang TOSP adunay mga aktibong grupo nga anaa sa siyudad sa Sugbu ug Negros Oriental nga maoy mopahigayon sa nahisgutang kalihokan, matud pa.

Ang YH nga kalihokan karong tuiga alang sa Central Visayas adunay lig-ong suporta gikan sa RFM Foundation ug sa Commission on Higher Education.(PIA-7/mbcn/Maryknoll B. Lagu

2012-01-10T14:52:00.000+08:00

Philhealth nihatag og lugway sa balayronon niadtong mga dapit nga apektado ni Sendong

CEBU CITY, Jan. 9 (PIA) -- Gilugwayan sa Philipine Health Insurance Corporation (PhilHealth) ang deadline sa individually paying members (IPM) alang sa 4th quarter 2011 adto na kini karong Marso 21 2012, hilabi na gayud niadtong mga dapit sa nasud nga naapektohan sa bagyong Sendong.

Sa gipahigayon nga press release, ang Philhealth nihatag og 3 ka buwan nga lugway aron paghatag og konsiderasyon niadtong mga miyembro nga nanimuyo sa lugar nga apektado sa bagyong Sendong.

Ang mga boluntaryo ug self employed nga mga IPMs kasagarang mobayad quarterly. Ang premiums pagabayran saw ala pa o sa katapusang adlaw ting trabaho sa matag calendar quarter aron ang deadline sa balayranan alang sa Oktubre ngadto sa Disyembre 2011 ari na sa Disyembre 29.

Apan ang Presidential Proclamation No. 303 nideklarar sa rehiyon 7, 9, 10, 11 ug Caraga ubos sa state of calamity gumikan sa grabeng kadaut tungod sa bagyong Sendong. Ang Philhealth nilugway sa deadline niining mga lugara isip ilang paagi sa matabangan ang ilang miyembro nga makasugakod sa ilang lisod nga kahimtang.

Tagaan usab sa samang konsiderasyon ang mga Overseas Filipino workers (OFW) ug mga miyembro sa KaSAPI nga nanimuyo sa nahisgutang mga rehiyon. (Translated into Cebuano by Amor Saludar/ PIA-CEBU)

==========

Lokal nga kagamhanan sa NegOr misaad ug dugang tabang pinansyal ngadto sa mga biktima sa Sendong

DUMAGUETE CITY, Jan. 9 (PIA) --- Ang mga pamilyang nabiktima sa bagyong Sendong sa Negros Oriental gikatakdang modawat ug dugang tabang pinansyal gikan sa local nga kagamhanan sa probinsya.

Kini base sa giluwatan nga pamahayag ni Gov. Roel Degamo nga ang probinsyal nga kagamhanan gikatakdang mohatag ug dugang P5,000 nga kantidad ngadto sa mga pamilyang biktima sa Sendong kinsa nawad-an gayud sa ilang mga panimalay ug tanang mga kabtangan.

Ang kagamhanan sa probinsya migahin ug mokabat sa 13 ka milyon nga pondo gikan sa ilang Quick Response Fund (QRF) isip tabang pinansyal ngadto sa mga biktima.

Gibutyag kini sa gobernador atol sa pagpang-apod-apod sa P10,000 nga tabang pinansyal gikan sa National Disaster Risk Reduction Management Council (NDRRMC) ngadto sa matag pamilya nga adunay mga kabanay nga nakabsan sa kinabuhi tungod sa dakong baha resulta sa bagyong Sendong niadtong Disyembre 17, 2011.

Mikabat sa 38 ka mga benepisyaryo ang nakadawat sa maong kantidad gikan sa NDRRMC, matud ni Capitol Information Officer Adrian Sedillo.

Si Department of Social Welfare and Development (DSWD) Sec. Dinky Soliman usab misaad nga ang ilang buhatan mohatag ug dugang P70,000 isip core shelter assistance ngadto s amga pamilyang nawad-an ug panimalay.

Kadtong mga pamilyang partially damaged ang mga panimalay makadawat usab ug mokabat sa P5,000 isip emergency shelter assistance.

Ang Provincial Disaster Risk Reduction Management Council (PDRRMC) sa probinsya, base sa ilang report niadtong Dec. 23, 2011, mikabat na sa 12, 260 ka pamilya ang apektado tungod sa bagyong Sendong sa ilang lamang probinsya.(mbcn/PIA-7/Maryknoll B. Lague CTU)

==========

Grupo gi-umol aron mangita'g solusyon sa problema sa mga kasapa-an sa NegOr.

DUMAGUETE CITY, Jan. 10 (PIA) --- Ang lokal nga mga opisyales sa kagamhanan sa Negros Oriental uban ang pipila ka mga pribadong sector miumol sa usa ka task force nga gitakdang maghatag ug dinaliang solusyon kalabot sa problema sa mga dagkong sapa nga miapaw atol sa pag-igo sa bagyong Sendong sa probinsya ning bag-o lang.

Ang Task Force Kinabuhi, gipangulohan ni Silliman University President ug inilang environmentalist Dr. Ben Malayang III. Kini human siya gipili sa mga mayor sa probinsya atol sa gipahigayong tigum niadtong January 4 uban ni Gov. Roel Degamo.

Ang task force gikatakdang mopahigayon ug pagtuon kalabot sa mga posibleng solusyon nga magsulbad sa problema sa sapa sa probinsya ug unang tumong sa grupo mao ang mga sapa sa Okoy, Banica ug Tanjay.

Buot sa grupo nga makakab-ot ug usa ka simple ug praktikal nga solusyon ug pamaagi sa pagtarong sa mga sapa aron malikayan ang subling pagkahitabo sa dakong baha nga mikalas ug daghang kinabuhi sa ilang probinsya.

Kahinumdoman nga ang mga sapa sa Okoy, Banica ug Tanjay miapaw atol sa pagkusokuso sa bagyong Sendong sa tibuok probinsya niadtong Disyembre 17, 2011.

Usa sa mga nag-unang rekomendasyon ni Dr. Malayang atol sa gipahigayong tigum mao ang pagbutang ug mga kanal ug pagpatukod ug mga water impounding projects libot sa mga sapa sa Okoy ug Banica.

Laing butang nga gihatagan ug pagtagad ni Malayang mao ang pagpananon ug daghang mga kawayan kilid ug daplin sa mga nahisgutang sapa.

Si Gov. Degamo gikatakdang mu-isyu sa usa ka kamandoan karong semana aron sa pormal nga pagkaumol sa Task Force Kinabuhi, matud pa sa pamahayag ni Capitol Information Officer Adrian Sedillo.

Gidugang ni Sedillo nga ang mga miyembro sa task force magpahigayon ug tigum 15 ka adlaw human mapormal ang mando alang sa paghisgot s amga unang lakang sa grupo base sa resulta sa ipahigayong pagtuon.

Sa pagkakaron, ang kagamhanan sa probinsya migahin ug mokabat sa P8 ka miyon nga pondo nga gitagana alang sa abang sa mga heavy equipment nga gamiton alang sa mga ipatuman nga proyekto ug programa.

Aduna usab laing P5M ang gitagana alang sa pagpatukod ug mga gabion isip usa sa mga flood-control measures sa probinsya. (mbcn/PIA-7/Maryknoll B. Lague-CTU)

2012-01-09T13:34:00.000+08:00

Bohol guv miaghat sa mga LGU sa pagpangita ug solusyon sa problema sa basura

TAGBILARAN CITY, Bohol Jan 9 (PIA) – Si Bohol governor Edgar Chatto, miawhag sa mga lokal nga kagamhanan sa pagpatuman ug mga bag-ong pamaagi sa pagsulbad sa problema sa basura sa probinsya.

Kini aron malikayan ang posibleng pagpadangat ug reklamo ngadto sa ilang probinsya tungod sa dili igong pagpatuman sa mando sa Republic Act 9003 o mas giila isip Ecological Solid Waste Management Program.

Giangkon sa gobernador nga sa pagkakaron, walay LGU ang nakatuman sa tanang mga kondisyon ubos sa maong balaod bisan pa man nga giila ang problema sa basura isip usa sa mga seryosong problema nga giatubang sa probinsya.

Atol sa bag-o lang gipahigayong nga Ecological Solid Waste Management Technical Working Group meeting, giila sa mga miyembro sa monitoring and evaluation team sa probinsya ang kawalay pagtagad sa mga opisyales sa lokal nga kagamahanan isip nag-unang hinungdan sa walay klarong pagpatuman ug solusyon sa maong problema.

Gibutyag sa Department of Environment and Natural Resources (DENR-7) nga bisan pa man sa balaod nga nagdumili sa pag-operate sa mga open dumpsites lukop nasud sugod niadtong tuig 2004, walay bisan usa ka sanitary land fill facility ang natukod sa probinsya sa Bohol.

Gipasabot usab ni Chatto nga bisan pa man sa pagpaningkamot sa iyang kagamhanan sa pagpatukod ug sanitary landfill facility, usa ka dakong babag sa iyang plano mao ang kakuwang sa pondo.

Apan dungan niini, gibutyag usab sa gobernador nga panahon na aron molihok ang mga LGU alang sa paghatag ug solusyon niining problema sulod karong tuiga.

Base sa usa ka pagtuon nga gipahigayon sa National Solid Waste Commision Secretariat, gibana-banang mokabat sa .5 kilo ang malabay matag tawo matag adlaw.

Sa kinatibuk-ang 1.2 ka milyon nga populasyon sa Bohol, mamahimong mokabat sa 60 ngadto sa 180 ka tunilada nga basura ang matigom niini matag buwan, kini matud pa sa DENR. (mbcn/PIA-7 & CTU/Maryknoll B. Lague)

=========

Programa sa kabalayan alang sa mga biktima sa bagyong Sendong ipatuman sa DSWD

CEBU CITY, Jan 9, (PIA) --- Ang Department of Social Welfare and Development (DSWD) mibutyag nga ilang gikatakdang ipatuman ug housing program alang sa mga biktima sa bagyong Sendong.

Matud sa pamahayag ni Social Welfare Secretary Corazon Soliman, prayoridad sa buhatan ang pagpili sa mga mag-unang benepisyaryo sa programa nga gilangkoban sa mga pamilyang adunay gagmayng bata, mabdos nga mga inahan, mga masakiton ug kadtong mga pamilyang nawad-an ug panimalay ug mga kabanay nga nakabsan sa kinabuhi nga walay igong katakos sa pagpausbaw sa ilang estado human sa resulta sa Sendong ngadto sa ilang tagsa-tagsa ka mga kinabuhi.

Ubos ning programa, ang mga benepisyaryo hatagan ug mga lig-ong pinuy-anan nga itukod ngadto sa mga mapiling relocation sites sa bisan asang dapit sa matag probinsya.

Ang mga social workers gikan sa matag lokal nga kagamhanan mao ang gitahasan sa pagpili sa mga benepisyaryo alang sa maong core shelter program.

Sa probinsya sa Cagayan de Oro, walo na ka mga temporaryong relocation site alang sa mga biktima ang gisugdan na pagpahiluna sa kagamhanan. Kini gilangkuban sa Calaanan, Lumbia, Agusan Elementary School, Mandumol basketball court, Buena Oro covered court, Camaman-an Covered Court, Fatima Parish Hall ug Mt. Carmel Church.

Aduna nay duha ka mga permanenting relocation site ang gipahiluna sa 9.5 ka ektaryang luna sa Calaanan ug dugang lima ka ektarya sa Lumbia.

Sa siyudad sa Iligan, aduna na usab tulo ka mga relocation sites ang napili sa buhatan. Gilangkoban kini sa walo ka ektarya nga luna nga gipanag-iya sa National Steel Corporation, dugang tulo ka ektarya nga anaa sa Sta. Filomena ug laing 14.4 ka ektarya sa Sta. Elena.

Usa usab ka temporaryong relocation site ang gitukod ngadto sa Integrated Bus Terminal nga nahimutang sa Batangay Tambo.

Sa pagkakaron, gibutyag sa DSWD nga aduna unay gipatukod nga mga gagmayng barong-barong sa Barangay Lumbia, Cagayan De Oro nga mamahimong mopahiluna sa mokabat sa dul-an 350 ka mga pamilya.

Ug gikatada pa kining dugangan alang sa pag-atiman sa laing 120 ka mga biktima samtang ang International Organization Mission (IOM) nisaad sa pagpatukod ug lain pang mga istruktura alang sa 230 ka mga pamilya.

Gawas sa mga barong-barong, aduna usab mokabat sa 80 ka mga tent and nagsilbing temporaryong pinuy-anan sa mga biktima ug gituohang adunay dugang 70 ka mga tent ang gikatakda pang ipahiluna sa umaabot.(mbcn/ml/PIA-7 & Maryknoll B. Lague/CTU)

==========

Mga biktima sa Sendong sa Dumaguete nakadawat ug libreng serbisyo medikal

DUMAGUETE CITY , Jan. 8 (PIA) – Mokabat sa 1,580 ka mga residente nga nanimuyo sa walo ka mga barangay nga labing apektado sa bagyong Sendong sa dakbayan sa Dumaguete ang nakadawat ug libreng mga medical services ug relief operation pinaagi sa pagpaningkamot sa Philippine Medical Association (PMA).

Ang walo ka mga barangay gilangkoban sa Candau-ay, Batinguel, Junob, Cadawinanon, Tabok Tubig, Poblacion 8, Bagacay Dapdap ug Bagacay Gumamela.

Kapin sa 80 ka mga miyembro sa army ang daling mitubag sa panawagan nga suporta sa proyekto sa PMA alang sa paghatag ug libreng serbisyo ngadto sa mga biktima sa Sendong sa tibuok probinsya sa Negros Oriental.

Ang grupo nga gipangulohan ni 302^nd Brigade Commander, Col. Francisco Patrimonio mitagana sa ilang tabang pinaagi sa paghatag ug seguridad, libreng trasportasyon ug manpower assistance alang sa gipahigayong medical consultations ug pagpang-apud-apud ug mga libreng tambal sa liboan ka mga biktima sa siyudad sa Dumaguete.

Human sa kapin duha ka semana human miigo si Sendong sa siyudad sa Dumaguete ug sa uban pang bahin sa Negros Oriental, daghang mga health practitioners ang mipaabot sa ilang mga tabang pinaagi sa pakiglangkob sa mga gipahigayong libreng medical missions sa lain-laing lugar sa probinsya.

Ang mga libreng medical services gilangkoban sa check-up, eye examination, simpleng operasyon ug libreng pagpang-apod-apod ug mga pagkaon.

Matud ni Col. Patrimonio, perming andam ang Philippine Army ilabi na ang 302 Brigade sa paghatag sa ilang libreng serbisyo ngadto sa mga panginahanglan sa mga biktima sa kalamidad nga mo-igo sa probinsya sama sa bagyong Sendong.

Dugang pa ni Patrimonio, kining maong kalamidad mao ang nagsukod sa pagtinabangay ug pag-inunungay sa mga katawhang Pilipino lukop nasud.

Uban pang mga buhatan nga milangkob sa maong kalihokan mao ang Provincial ug City Health sa NegOr, Department of Social Welfare and Development, National Telecommunications Commission, Federation of Volunteers thru Radio Communications, Sto Nino Augustinian Development Foundation, ug uban pa.(mbcn/PIA-7 & CTU/Maryknoll B. Lague)

2012-01-06T15:43:00.001+08:00

Konsyerto ipahinungod alang sa mga biktima sa bagyong Sendong

DUMAGUETE CITY, Jan. 5 (PIA) --- Ubang mga musikero ug artists sa Negros Oriental naghiusa pinaagi sa fund-raising concert alang niadtong mga biktima sa bagyong Sendong. Ang nahisgutang konsyerto o concert-for-cause ipahigayon karong Enero 6 sa 7:00 sa gabii adto sa Macias Sports Center, Capitol Area, siyudad sa Dumaguete.

Sumala pa sa Concert organizer core group representative nga si Glynda Descuatan ang maong konsyerto magdala sa titulong “Hugyaw! sa Panaghiusa-Kalipay-Paglaum,” nga mopasundayag sa mga maayong talent sa probinsya.

Ang entrance fee sa maong konsyerto mobalor og P50 diin magsilbi usab nga donasyon nga magamit alang sa tents, construction materials ug uban pa nga gikinahanglan nga suplay alang niadtong mga balay nga nakaangkon og grabe ug dili kaayo grabe nga kadaot sa bagyo.

Matud pa ni Descuatan kini nga lakang dako og matampo aron mahupay ang kalisud nga gibati sa mga biktima nga anaa karon nagtapok sulod sa mga simabahan, ug mga Day-Care Centers, o sa bisan asang bakanti nga luna uban sa ilang mga tagtungod nga maglisud usab pagsuporta sa ilang kaugalingon nga pamilya.

Gipasabot usab niya nga aron mamahimong lahi og mas mahinungdanon ang maong programa bahinon kini ngadto sa tulo ka parte diin ang una mao ang Panaghiusa kinsa maglakip sa partisipasyon sa mga panan-away, community singing, getting together activities dinuyogan sa live band nga paresan usab sa Youth Band Z’MAR sa Sibulan United Church of Christ in the Philippines lakip na usab ang Youth Advocate Through Theatre Arts.

Ang Kalipay ang pinakadakong parte sa maong programa pinaagi sa pasundayag sa Dance Troupes, Dance Crews ang mga mananaug sa local, regional ug national contests, fashion shows ug choir groups sa mga korporasyon.

Ang ikatulo’ng parte mao ang Paglaum nga mopasundayag sa mga testimoniya sa paglaum sa mga apektado’ng pamilya dugangan usab sa mga videos ug hulagway nga kuha sa mga nagkadaiyang mga grupo nga ipasalida sa dako nga screen, inspirational numbers gikan sa mga choir sa simbahan, presentasyon sa Pavaroti sama sa singer nga si Mano Saldivar u gang Singing Priests, human niini isunod ang hinusang panaad sa komunidad, ug dayon tapuson ang programa pinaagi sa usa ka pangaliya.

Ang mga organizers nag-awhag sa publiko nga suportaan ang concert-for-a-cause aron matabangan ang mga biktima sa bagyong Sendong sa siyudad sa Dumaguete. (Translated into Cebuano by Amor Saludar/PIA-CEBU)

===========

CSOs gikatakdang makigtambayayong sa mga LGU alang sa mas limpyong pangagamhanan

DUMAGUETE CITY, Jan. 6 (PIA) -- Ang mga Civil Society Organizations (CSOs) ug pipila la mga lokal nga opisyales sa Valencia ug San Jose sa siyudad sa Dumaguete mitambong sa usa ka workshop nga adunay titulo nga “Increasing Transparency in Local Governance through Informed Citizens’ Participation,” ning bag-o lang.

Ubos sa Code nga RED o Reforms for Economic Development, ang maong seminar buot maghatod ug dugang kaalam sa mga kawani kalabot sa ilang mga responsibilidad ug mag-abli ug bag-ong oportunidad sa panagtambayayong sa duha ka habig aron sa pagpausbaw

sa transparency alang sa mas maayong dagan sa kagamhanan.

Ang RED usa ka proyekto nga gipangulohan sa British Embassy uban sa pakigtambayayong sa Social Watch Philippines ug sa Silliman University.

Sa duha ka managlahing oras, mokabat sa 60 ka mga local nga opisyales sa matag lungsod ang mipaubos sa maong workshop nga gipahigayon sa Bethel Guest House.

Gawas sa mga LGU, lakip usab sa mga partisipante mao ang mga municipal planning officer, treasurer ug budget officer sa matag LGU. Ang maong workshop naghisgot kalabot sa mga plano sa kauswagan, revenue resources, budget allocation, pagpili ug dugang tinubdan s amga pondo sa mga proyekto, priority spending ug uban pa.

Buot usab sa proyekto ag paghatag ug dugang kaalam sa mga CSO kalabot sa basic local finance base sa gitakda sa Local Government Code kung diin sila gihatagan ug katungo sa pakiglangkob sa mga budget deliberations.

Usa ka grupo sa mga local finance experts nga gipangulohan sa kanhi National Treasurer ug Social Watch Philippines Lead Convenor Leonor Briones ang mipahigayong sa maong kalihokan.

Dugang mga tigpamaba ang mipaambit sa ilang mga kaalam mao sila si Jessica Cantos, Cielo Magno ug Leilani Galvez gikan sa Social Watch Philippines. (mbcn/PIA-7 & CTU/Maryknoll B. Lague)

==========

DENR-7 miaghat sa publiko sa paglikay sa grabeng basura atol sa selebrasyon sa Sinulog

CEBU CITY , January 6 (PIA) --- Ang buhatan sa Department of Environment and Natural Resources (DENR-7) dinhi sa Central Visayas miaghat sa tanang katawhan sa pagdala ug linahing sudlanan alang sa mga malata ug dili malata nga mga basura atol sa selebrasyon sa Sinulog karong tuiga.

Lakip na usab nga tambag sa buhatan ang paggamit ug mga re-usable items isip sudlanan sa mga pagkaon ug ilimnon nga dalhon atol sa pagpanuroy sa maong adlaw.

Dugang pang tambag ni DENR -7 regional executive director Maximo Dichoso sa katawhan mao ang pagdala lamang ug igong gidaghanon sa pagkaon ug kun ugaling adunay mga sobra dalhon kini balik s amga panimalay isip pagkaon sa mga inatiman nga hayop o dili ba kaha gamiton isip compost material, dili usab kini angayang sunogon aron paglikay sa dugang polusyon sa hangin sa dakbayan.

Kining tanan aron malikayan ang pagdagsa sa grabeng pundok sa mga basura atol sa labing dakong selebrasyon sa Sugbu.

Giaghat usab ni Dichoso lakip ang mga local government units (LGU), negosyante ug mga establsyemento sa Sugbu ug Mandaue sa pagbutang ug dugang mga basurahan sa nagkadaiyang lugar isip suporta sa hugot nga kampanya sa siyudad sa pagsegregate sa mga basura.

Liboan ka mga Cebuano ug uban pang local ug langyaw nga torista ang gituohang modagsa sa mga kadalanan sa siyudad karong umaabot nga Enero 15 alang sa ipahigayong celebration cum parade procession alang sa balaang bata Sr. Santo Niño.

Base sa natala sa DENR, ang gibana-banang gidaghanon sa basura sa siyudad mokabat sa 511 ka tonilada matag adlaw o 0.7 ka kilo matag tawo kadala adlaw.

Bisan pa man usa ka lig-ong tradisyon ang pagmaya atol sa Sinulog, giaghat ni Dichoso ang katawhan sa paghunahuna kalabot sa mga posebleng epekto sa mga basura nga ilabay bisan asang dapit sa kadalanan ngadto sa kalikopan alang usab sa kaayohan sa kadaghanan.(mbcn/PIA-7 & CTU/Maryknoll B. Lague)

============

Mga kabanay sa mga biktima sa bagyong Sendong nakadawat ug hinabang gikan sa NDRRMC

CEBU CITY, Jan. 6 (PIA) --- Ang mga kabanay sa mga biktima sa bagyong Sendong sa probinsya sa Negros Oriental nakadawat ug kwartang hinabang gikan sa National Disaster Risk Reduction Management Council (NDRRMC) atol sa gipahigayong turn over kagahapong adlawa didto sa Session Hall sa buhatan sa kapitolyo sa probinsya.

Personal nga gipangulohan ni gobernador Roel Degamo ang pagpang-apud-apud sa mga sobre nga adunay sulod nga kantidad nga mokabat sa P10,000 ngadto sa matag usa sa 38 ka mga pamilyang nawad-an ug kabanay tungod sa dakong baha resulta sa bagyong Sendong.

Ang kinatbuk-ang kantidad sa hinabang gitugyan sa NDRRMC ngadto sa Office of Civil Defense (OCD).

Ang tanang mga piniling benepisyaryo naggikan sa lain-laing lungsod sa probinsya nga grabeng apektado sa bagyong Sendong, ug kini gilangkoban sa Valencia, Sibulan, Dumaguete City, Bacong, Siaton, San Jose, Tanjay City ug Pamplona.

Matud ni OCD Region 7 Director Minda Morante, aduna pa’y laing nagpaabot nga mga hinabang alang sa uban pang mga pamilyang biktima sa nahitabong baha.

Human sa pagpang-apod-apod sa mga kwartang hinabang sa mga pamilyang nawad-an ug kabanay, sunod nga atimanon sa probinsya mao ang paghatag usab ug hinabang sa mga pamilyang nawad-an sa ilang mga panimalay.

Lakip sa mga nakadawat sa kantidad mao si Elvin Balbon, 36, nawad-an sa iyang amahan ug tulo ka mga anak human gibanlas sa dakong baha ang ilang pinuy-anan nga nahimutang sa Brgy. Tibtubon, lungsod sa Sibulan

Gibutyag ni Balbon nga buot niyang gamiton ang iyang nadawat nga hinabang gikan sa gobyerno sa pag-abang ug yuta o pinuy-anan nga mamahimong puy-an niya ug sa iyang mga nahabiling miyembro sa pamilya.

Human sa nahitabong turn-over, giaghat ni Gov. Degamo ang mga pamilya sa pagpangita ug luwas nga mga lugar nga maoy mamahimo nilang bag-ong pinuy-anan ug dili na mobalik sa mga lugar nga kuyaw sa baha ug pagdahili sa yuta.

Kahinumdoman nga ang bagyong Sendong miigo sa probinsya niadtong Disyembre 17, 2011 nga miresulta sa pag-apaw sa duha ka mga dagkong sapa nga maoy mibanlas sa mga kabalayan, taytayan ug uban pang mga edipisyo sa Negros Oriental.

Matud sa usa ka report nga gipagawas sa Provincial Disaster Risk Reduction Management Council (PDRRMC) niadtong Disyembre 23, 2011, mokabat sa 37 ka mga kinabuhi ang nakalas uban sa laing unom nga padayon pang gipangita.

Gibana-banang mokabat sa P694.45 ka milyon ang kinatibuk-ang danyos sa tanang imprastraktura nga nahanaw lukop probinsya.(mbcn/PIA-7 & CTU/Maryknoll B. Lague)

==========

PAGASA-Cebu mipahimangno sa mga mulupyo duol sa sapa

SIQUIJOR, January 6 (PIA) – Gipahimangnoan karon sa PAGASA-Mactan ang mga mulupyo duol sa sapa ug kasubaan sa pagkamabinantayon tungod kay ang unang tulo ka bulan ning tuiga makasinati na usab ug pag-ulan tungod sa La Niña phenomenon.

Si PAGASA-Mactan Chief Oscar Tabada sa usa ka media interview miingon nga mihatag na sila ug “evacuation warnings” sa tanang hingtungdan gumikan kay ang Cebu ug uban pang dapit sa nasud makasinati sa mapadayonong pag-ulan sugod sa Enero ngadto sa Marso ning maong tuig.

Mipahimangno ilabi na si Tabada nga ang La Niña magdala ug makusog nga ulan sa Kabisayaan sa bulan sa Pebrero ug Marso samtang siya miabiso niadtong nagpuyo sa mga makuyaw nga dapit kon “danger zones” sama sa sapa, suba ug sa uban pang “landslide” ug flood-prone nga dapit sa pagkamabinantayong ug pagbiya gilayon sa ilang panimalay kon magdaut ang panahon.

Sumala sa PAGASA, adunay lima ka bagyo ang gituohang modangat sa nasud sa unang lima ka bulan sugod Enero hangtud Mayo ning tuig.

Sumala pa, walo na ka automatic weather stations (AWS), usa ka himan nga mosukod sa kadaghanon sa ulan ang gipahiluna sa Metro Cebu, Bogo City, Bantayan Island ug Camotes Island sa amihanang dapit sa Sugbu ingon man sa mga lalawigan sa Bohol ug Negros Oriental.

Lain na usab nga AWS giplanong ibutang sa Alegria, sa habagatang bahin sa Cebu.

Si Tabada miingon nga ang 7.5 milliliters nga ulan maka-triger ug pagdahili sa yuta ug pagbaha sa mga makuyaw nga mga dapit. (Translated into Cebuano by Rizalie Anding Calibo)

==========

Pulis istriktong moimplementar sa balaod sa kadalanan

Ni Rizalie A. Calibo

SIQUIJOR, January 6 (PIA) -- Gumikan sa pagdaghan sa kaso sa mga disgrasya sa kadalanan, gipanghingusgan karon sa kapulisan ilabi na sa Lazi Police Station ang pag-impelementar sa balaod sa kadalanan ngadto sa mga drayber.

Gawas sa helmet, target na usab karon sa mga pulis ang paghipos sa mga motor nga walay plaka nga nakataod.

Sumala pa gisugdan kini niadtong miaging duha ka bulan diin adunay motor ang daling gihipos sa kapulisan sa Lazi Police Station human kini makit-an ga gigamit sa usa ka motorista bisan walay nakasab-it nga plaka.

Si Police Inspector Romeo Cubo miingon nga daghan na ang kaso sa disgrasya sa kadalanan nga nahitabo ug kasagaran nga nalambigit niini nga motor katong walay plaka.

“Mapugos gayud mi pagsikop sa mga motorist nga dili matuman sa balaod, matud pa niya. (mbcn/rac/PIA-Siquijor)

2012-01-05T15:38:00.002+08:00

Greening program alang sa kaayohan sa sektora sa panguma

CEBU CITY, January 5 (PIA) --- Gibutyag sa Department of Environment and Natural Resources (DENR-7) nga ang national greening program sa gobyerno dako og mahatag nga kaayohan sa sector sa agrikultura hilabi na gayod sa pagpausbaw sa mga patubigan.

Matud pa ni DENR-7 Regional Executive Director Maximo Dichoso nga kini nga lakang sigurado gayod nga makasuplay og tubig nga sarang makabasa sa mga kaumahan.

Iya usab nga giawhag ang business sector, academe, non-government organizations ug uban pa nga mga hingtungdan nga suportaan ang National Greening Program (NGP) dinhi sa tunga tungang kabisay-an.

Kini nilambo dihang ang DENR-7 gikatakda nga molukop sa 10,628 ektarya karong tuiga o188.71% nga pagsaka sa target nga 5,632 ektarya niadtong miaging tuig sa upat ka mga probinsya nga gilangkoban sa of Bohol, Cebu, Negros Oriental ug Siquijor.

Matud pa ni Dichoso nga gikinahanglan ang pagtinabangay alang ning maong programa ug sa hiniusang pagmintenar niini ug sa samang higayon palig-onon ang social mobilization ug volunteerism pinaagi sa tambayayong sa pribado ug publikong mga nagkadaiyang hingtungdan aron masiguro nga makab-ot gayod nag tumong sa pagtanom og 3.523 milyones ka mga seedlings karong tuiga.

Dugang pa niya nga pinaagi sa pagpangayo sa suporta ug panabang sa atong mga sector sa pagpatigayon masiguro unya nga kadtong mga gipangtanoman nga mga luna maatiman ug mahatag ang ensaktong mga kalihukan sa pagmintenar niini pinaagi usab sa resources gikan sa DENR.

Kahinumdoman sa Presidente ni isyu sa EO-26 niadtong Pebrero 24, 2011 nga deklarar sa National Greening Program isip inisyatibo nga prayoridad sa gobyerno sa pagpakunhod sa kakabos, paghatag og seguridad sa pagkaon, stability and biodiversity conservation, ug pagpalambo sa climate change mitigation and adaptation.

Labaw sa tanan tumong usab niini nga makatanom og 1.5 billion seedlings sa 1.5 million hectares nga pampublikong luna tibook nasud sulod sa unom ka tuig gikan 2011 hangtod 2016. Kini sobra pa sa katunga sa kalampusan nga nakab-ot sa kagamhanan sulod sa 25 ka tuig sa730,000 hectares.

Gipasabot ni Dichoso nga ang NGP tubag usab problema sa soil erosion, seguridad sa malungtarong suplay sa tubig ug makahatag ug dugang nga panginabuhian sa mga mag-uuma pinaagi sa agroforestry. (FCR/Translated into Cebuano by Amor Saludar/PIA-CEBU)

============

Noynoy, Binay gidapit alang sa pagsaulog sa Sinulog

CEBU CITY, Jan. 4 (PIA) --- Ang mayor sa siyudad sa Sugbu Micheal Rama midapit ni Presidente Benigno “Noynoy” Aquino III ug bise presidente Jejomar Binay sa pagtambong ug pagsaulog sa Sinulog Grand Parade karong umaabot nga Enero 15, 2012.

Matud sa siyudad, andam na ang tanang kalihokan kalabot sa selebrasyon sa Sinulog nga naglangkob sa usa ka opening salvo ugmang adlawa ug ang pagsugod sa labing gipaabot nga Sinulog 2012 karong Biyernes.

Base sa pamahayag sa Sinulog Foundation Inc. executive director nga si Ricky Ballesteros, mokabat sa dul-an 1.7 ka milyon ka pesos ang danyos nga gitagana sa siyudad alang sa Sinulog stage ug hapit na kini makompleto.

Ang selebrasyon sa Sinulog karong tuiga gikatakdang mopakita sa lain-laing kultura sa Sugbu, base sa titulo nga nakuha sa siyudad sa miaging tuig atol sa gipahigayong Association of Southeast Asian Nation.

Ang kinatibuk-ang gasto sa pagpangandam sa labing dakong kalihokan sa siyudad mikabat sa P35 ka milyon ngadto na sa 40 milyones ka pesos gawas pa sa mga gitaganang mga premyo sa mga mananaog.

Gibutyag ni Ballesteros nga ang premyo alang karong tuiga mikabat sa P20 ka miyon kompara sa P12 ka milyon ka pesos sa miaging tuig.

Usa ka milyon ka pesos na usab ang nagpaabot nga ganti alang sa Grand winner ug ang dugang budget alang sa matag contingent misaka ngadto sa P150,000 gikan sa P100,000 sa miaging tuig.

Gipaabot nga adunay 12 ka mga out-of-town contingent ang molangkob karong tuiga samtang ang mga contingent gikan sa Sugbu mahibaw-an atol sa ipahigayong Sinulog sa Kabataan sa Lalawigan karong Sabado ug sa Sinulog sa Kabataan sa Dakbayan karong Dominggo.

Sa kinatibuk-ang budget, P2.5 milyon niini ang itagana alang sa giandam nga Grand Finale, kung diin adunay usa ka 30-minute show nga magpakita sa lain-laing industriya nga Makita dinhi sa dakbayan ug lalawigan sa Sugbu.

Laing paabuton mao ang pagsayaw na usab ni Representative Rachel “Cutie” del Mar atol sa grand finale ug ni Governor Gwendolyn Garcia uban sa Argao Contingent isip labahin sa iyang panaad matag tuig.

Aduna usab ipahigayon nga usa ka opening mass karong petsa 15 nga pangulohan mismo sa Archbishop sa Sugbu Father Jose Palma.(PIA-7mbcn/Maryknoll B. Lague CTU)

===========

Greening program sa kagamhanan gikatakdang muhatag ug benipisyo sa sector sa agrikultura

CEBU CITY, January 4 (PIA) – Ang buhatan sa Department of Environment and Natural Resources (DENR-7) mibutyag sa planong paghatag ug dugang benepisyo ngadto sa sector sa agricultura sa nasud pinaagi sa pagpatuman ug lain-laing mga proyekto sama na sa pagpausbaw sa mga tinubdan sa tubig subay sa gipatumang National Greening Program sa nasud.

Matud sa regional executive director sa DENR-7 Maximo Dichoso, kining maong proyekto buot maghatag ug igong suplay sa tubig alang sa mga nagkadaiyang umahan lukop nasud.

Mokabat matud pa sa 10, 628 ka ektaryang luna nga anaa sa probinsya sa Bohol, Cebu, Negros Oriental ug Siquijor ang gikatakdang malangkob ubos niining maong programa.

Dungan niini, giaghat usab ni Dichoso ang uban pang mga dagkong sector sa nasud sa paghatag ug lig-ong suporta sa padayong pagpatuman sa National Greening Program (NGP) dinhi sa Central Visayas alang usab sa pagkab-ot sa katuyoan sa programa.

Pinaagi sa tabang ug suporta sa mga negoryante ug uban pang mga pribadong sector, nanghinaot ang DENR-7 nga makab-ot sa CV ang pagpananom ug mokabat sa 3.523 ka milyon ka mga punuan sa kahoy karong tuiga.

Kahinumdoman nga ang National Greening Program gipanguluhan ni president Aquino ug gisugdan niadtong February 24, 2011 pinaagi sa pag-isyu niini sa EO-26 nga dagdeklarar sa paghatag ug dakong pagtagad sa mga nag-unang panginahanglan sa nasud sama sa pagwagtang sa kakabos, pagpausbaw sa suplay sa pagkaon ug lakip na ang pag-amping ug pagpausbaw sa kalikopan sa bisan asang probinsya sa tibuok nasud.

Nag-unang tuyo usab sa programa mao ang pagpananom ug mokabat sa 1.5 ka bilyon nga binhi ngadto sa 1.5 ka milyon nga ektrayang luna sa nasud sulod sa unom ka mga tuig, sugod 2011 hangtod sa tuig 2016.

Gawas sa pagpalambo sa kinaiyahan, ang pagpananom ug mga kahoy makahatag usab ug kasulbaran sa lain pang mga problema sama sa grabeng pagbaha ug pagdahili sa yuta kung diin ang kasagarang gitudlong hinungdan mao ang illegal nga pagpamutol sa mga kahoy sa atong mga kalasangan.(mbcn/ml/PIA-7)

2012-01-04T17:26:00.000+08:00

Mga minahan sa tunga tungang kabisay-an

niimplemetar og programa pagprotiher sa kinaiyahan

CEBU CITY, January 3 (PIA) -- Mga minahan dinhi sa tunga-tungang kabisay-an nga kasagarang nagbase dinhi sa Sugbo niimplemetar na og ilang kaugalingon nga programa nga gipunting aron maprotektihan ang kinaiyahan sigun sa kamanduan ubos sa Philippine Mining Act of 1995.

Si Department of Natural Resources and Environment - Mines and Geosciences Bureau (DENR-MGB) 7 Director Loreto Alburo nagkanayon nga ang balaod nagmando nga ang mga minahan kinahanglan moimplementar og mga programa nga gitumong alang sa proteksyon ug pagpalambo sa kinaiyahan kun environmental protection and enhancement programs (EPEP).

Dugang pa ni Loreto nga base sa talaan sa MGB 7 ang mga minahan nigasto og mokabat ngadto sa P186.2 milyones nga kantidad sa mga proyekto nga may kalambigitan sa proteksyon og pagpalambo sa kinaiyahan.

Sumala pa nga ang mga programa kabahin sa proteksyon sa kinaiyahan nga giimplementar sa mga minahan naglakip sa rahabilitasyon sa dapit nga giminahan ug potensyal nga kagamitan sa dapit ingon man mga environmental protection measures atol mismo sa aktwal nga operasyon sa mina.

Sa P186.2 milyones nga kinatibuk-ang EPEP nga naimplemetar ang Carmen Copper Corporation sa siyudad sa Toledo ang nakakuha sa pinakadako nga bahin sa kantidad nga P156.7 milyones gisundan sa Apo Cement Corp. and Apo Land and Quarry Corp. sa Naga sa kantidad nga P11.2 milyones.

Ang Taiheiyo Cement Philippines Inc. ug Solid Earth Development Corp. sa lungsod sa San Fernando habagatang bahin sa Sugbo nialokar og mokabat ngadto sa P5.06 milyones alang sa ilang kaugalingon nga programa aron pagprotiher sa kinaiyahan.

Ang ubang mga minahan nga nisagop usab sa mga programa nga rahabilitasyon og pagpalambo sa kinaiyahan naglangkob sa Philippine Mining Service Corp. ug Dolomite Mining Corp. sa lungsod sa Alcoy uban sa kantidad nga P5.9 milyones; Philippine Mining Service Corp. ug Bohol Limestone Corp. sa Garcia-Hernandez Bohol sa kantidad nga P3.5 milyones; ug P2 milyones gikan sa JLR Construction and Aggregates Inc. sa siyudad sa Naga. (Translated into Cebuano by Amor Saludar/PIA-Cebu)

===========

Hydrophonics nga pagpananom alang sa mga benipisyaryo sa Pantawid

ipahigayon sa tunga tungang kabisay-an

by Amor Saludar

CEBU CITY, Jan 02 (PIA) --- Nilagda og kasabutan bag-ohay lang ang Department of Social Welfare and Development ug ang Department of Science and Technology dinhi sa tunga tungang kabisay-an alang sa pagbansay- bansay sa mga benipisyaryo sa Pantawid Pamilya mahitungod sa hydrophonics gardening.

Gibutyag ni DOST-7 ARD for Technical Operations, Ed Paradela nga kini nga lakang usa sa mga tubag sa ahensya sa panawagan sa MDG nga makunhoran ang kakabus sa nasud diin mao usab ang tumong sa DSWD.

Matud pa ni Paradela nga ang DOST mohatag sa gikinahanglan nga ayuda alang sa malungtarong panginabuhian sa mga kliyente sa DSWD nga gisugdan sa mga benipisyaryo sa Pantawid Pamilya nga nagkat-on kabahin sa hydrophonics gardening.

Samtang si DSWD-7 Pantawid Pamilyang Pilipino program coordinator Aileen Lariba nagkanayon nga ang paspas nga urbanisasyon giduyugan usab sa paspas nga pagsaka sa kakabus sa mga kalungsoran ug siyudad.

Dugang pa ni Lariba nga kasagaran sa mga siyudad tungod sa ilang intensyon nga molambo mamatikdan na lang unya niini nga ang ilang mga konstitwente wala na’y permanente nga panginabuhian nga sarang ikabatok sa kalisud.

“They also have increasing problems with the disposal of urban wastes, waste water and maintaining air quality,” matud pa ni Lareba.

Nipaambit usab si Lareba nga samtang ang programa sa DSWD nga Pantawid Pamilya nangita og paagi unsaon pagtabang sa mga kabus nga pamilya, ang gipirmahan nga MOA uban ang DOSTb parte usab sa stratehiya sa convergence tali sa mga ahensya sa gobyerno himoong hetsas ang mga benipisyaryo sa mga capability training sa mga programa pagpakigbatok sa kakabus.

Nagkanayon si Paradela nga ang Hydrophonics naila usab sa tawag nga urban gardening ug nanginahanglan lamang og gamay nga luna, minimal o wala nagkinahanglan og yuta ug ang paggamit sa mga basura sama sa styropores ug mga plastic containers.

Gikutlo ni Lariba ang taas nga balor sa produksyon ug distribusyon sa mga pagkaon nga gibase sa produksyon sa mga kabukiran ug imports ang nakaingon sa taas nga presyo niini.

Matud pa niya nga pinaagi unya sa teknolohiya sa Hydrophonics ang mga kabus nga anaa manimuyo sa siyudad aduna na unya’y kahigayonan nga makapahimulos sa mga sustansyado nga pagakaon sa ubos lamang nga presyo ug sa samang higayon malikayan usab ang kakulangan sa pagkaon.

Gibutyag ni DSWD-7 regional director Ma. Evelyn Macapobre nga ang barangay Sawang Calero sa siyudad sa Sugbo ang napilian isip pilot area sanglit anaa kini nahimutang sa labing pinaka ‘urbanized depressed’ nga parte sa siyudad sa Sugbo.

Dugang pa ni Macapobre nga ang mga benipsyaryo mismo ang nipadayag nga gikinahangalan gayod nila nga makakat-on og mga alternatibong pamaagi sa pagnanom isip pang alkontra sa malnutrasyon. (FCR/AS/PIA-CEBU)

2012-01-02T10:23:00.002+08:00

DSWD- 7 motanyag og dugang panginabuhian sa mga Pantawid benipisyaryo

by Amor Saludar

CEBU CITY December 30 (PIA) -- Ang Department of Social Welfare and Development (DSWD-7) ning bag-ohay lang nipagawas og mokabat ngadto sa 800 hundred thousand pesos ngadto sa 11 ka Employment Assistance – Kaunlaran Associations sa mga lungsod sa Jimalaud, Tayasan ug La Libertad sa Negros Oriental.

155 ka mga benipisyaryo Pantawid Pamilyang Pilipino Program sa Negros Oriental nakadawat og P796, 000.00 nga seed capital. Pinaagi ning maong kantidad ang mga benipisyaryo matagaan og oportunidad nga mokita ang ilang tagsa tagsa ka mga negosyo.

Si Negros Oriental Governor Roel Degamo kauban ni Assistant Regional Director Nemia Antipala maoy nibukas sa maong okasyon ug ni turn over sa naasoyng kantidad ngadto sa Pangalwan, Pantao, Camand, Bayhill, Palaslan, Maloloy-on, Kauswagan, Mapalaslan, Mambulod ug Manghulyawon SEA-K Associations.

Sa kasamtangan ang DSWD-7 nakapagawas na og P5, 136, 000.00 nga seed fund alang sa 952 Pantawid SEA-K beneficiaries sa mga Set areas sa probinsya sa Negros Oriental.

Gipahibalo ni Director Antipala atol sa naasoyng turn over ceremony nga laing 8.5 milyones pa unya ang ang mapaabot sa mga benipisyaryo sa SEA-K sa probinsya sa Negros Oriental sa dili pa matapos ang tuig.

Ang SEA-K program usa mga programa sa nasudnong nga kagamhanan nga gitumong alang sa mga kabus nga pamilyang Pilipino aron sila matabangan pagbuntog sa kakabos.

Sa maong programa ang mga benipisyaryo mahimong makahuwam sa kantidad nga P10, 000.00 aron sila makasugod og negosyo sa walay interest og pagabayaran sulod sa usa ka tuig.

Ang mga benipisyaryo gipaubos usab og training sa business management aron pagsiguro nga makabayad gayod sila sa kantidad nga ilang gihuwaman pag abot sa usa ka tuig. (FCR/AS/PIA-Cebu)

2011-12-27T21:28:00.002+08:00

Sugbo nagkahiusa sa padayong pagtabang sa CDO

ug uban pang dapit nga apektado ni Sendong

by Amor Saludar

CEBU CITY December 27 (PIA) -- Naghiusa ang mga Cebuanos sa paghimo kutob sa mahimong tabang alang niadtong mga biktima sa bagyong Sendong nga niigo didto sa Cagayan de Oro ug Iligan City .

Tunga tunga sa gipahigayon nga Christmas sa Capitol Association of Reporters in Tri-media nakalikum kini og salaping kantidad nga P14,080 pinaagi sa pag organisar og lima ka minuto nga flower dance diin ang nahisgutang kantidad gidoble ni Governor Gwendolyn Garcia.

Subay niini ang Mactan-Cebu International Airport Authority (MCIAA) Board nitunol usab sa kantidad nga P1 million isip hinabang pinansiyal ngadto sa mga nabiktima sa bagyong Sendong didto sa Mindanao .

Samtang si Mayor Ricardo Ramirez sa lungso sa Medillen, Cebu nipagawas usab og duha ka tseke sa kantidad nga P50, 000 matag usa alang sa Cagayan de Oro ug Iligan.

Ang Planning and Development Officer nga si Giles Anthony Villamor nangulo usab sa mga kawani sa gobyerno sa lungsod sa Medillen sa katukoran sa “Operation Tabang”, alang sa mga biktima sa bagyong Sendong.

Gikataho nga molarga si Medilllen Mayor Ramirez karon semanaha ngadto na sa mga lugar sa Mindanao nga apektado sa bagyong Sendong, dungan ni Gov. Garcia ug uban pa nga mga mayor sa probinsya. (FCR/AS/PIA-CEBU)

==========

MCWD niabag sa suplay sa tubig sa CDO

by: Amor Saludar

CEBU City December 27 (PIA) --- Ang Metropolitan Cebu Water District (MCWD) nagpadala og duha ka water trucks ngadto sa Cagayan de Oro aron makatabang nga madugangan ang distribusyon sa limpyo nga tubig didto sa mga dapit nga apektado sa bagyong Sendong.

Sumala pa ni MCWD Manager Armando Paredes nga kini nga tabang modirekta ngadto sa Cagayan de Oro Water District tungod kay ang kapasidad niini sa pag distribute og tubig nikunhod og 20 porsiyento human sa lunop nga nakamugna og dakong kadaut sa ilang linya.

Dugang pa ni Paredes nga nag unang problema karon sa Cagayan de Oro Water District mao ang distribusyon sa limpyo nga tubig ngadto sa mga katawhan kini tungod ka yang tanan nga water system sa naasoy’ng dapit pulos nangaguba.

Gitataw usab niya nga komon na kini alang sa 500 ka mga water districts sa nasud nga magtinabangay sa usag usa panahon sa krisis.

Gikataho nga ang duha ka water trucks sa MCWD aduna kini 10-cubic meter capacity ug ang MCWD na usab ang niabaga sa fuel ug manpower.

Human sa mabangis nga pagkuso kuso sa bagyong Sendong usa sa mga problema nga giantos sa mga apektadong residente mao ang kakulangan sa limpyo nga tubig nga mainom ug magamit sa pagkaligo ug pagpanglimpyo.

Gikataho nga gibana banang mokabat pa ngadto sa kapin kun kulang usa ka buwan una mobalik sa normal ang distribusyon sa mainom nga tubig didto sa mga apektadong dapit Cagayan de Oro.

Samtang gipaniguro ni Paredes nga dili gayod maapektohan ang ilang serbisyo dinhi sa Sugbo bisan pa man sa gihimong tabang didto sa Cagayan de Oro tungod kay ang MCWD aduna kini upat ka water trucks. (FCR/AS/PIA-CEBU/)

2011-12-23T17:28:00.001+08:00

Negosyante sa Sugbo gi-awhag i-renew ang biz permit wala pay Enero 20

By: Juju S. Manubag-Empuerto

CEBU CITY. Dec 23, 2011 (PIA) --- Aron malikayan ang multa, ang Cebu City Treasurer’s Office (CTO) sa Sugbo midasig sa mga negosyante sa pag-renew sa ilang business permit sa wala pay Enero 20 sunod tuig.

Mao kini ang panawagan ni Assistant City Treasurer nga si Emma Villarete sa CTO.

Sumala ni Villarete nga mitino ilang buhatan ug kapin 23,000 ka mga negosyante gikan sa gagmay, medyum ug dagko nga tigpapatigayon sa Sugbo nga mo-renew sa ilang mga lisensiya sa pagnegosyo tungod kay ang buhis nga makolekta niini kay usa sa dako nga kakuhaan ug pundo sa siyudad.

Karon lang tuiga, ang siyudad nakakolekta ug kapin sa P960 milyones kutob niadtong Disyembre 17 ug sa bulan sa Enero nga maoy bulan sa kinadaghanang hakot sa buhis sa mga patigayon.

Nunot niini, ang CTO mobutang ug ‘one-stop shop’ sa Elizabeth Mall , atbang sa Government Service Insurance System (GSIS) sunod bulan.

Ang ‘one stop-shop’ pagadumalaan ug mga sakop sa CTO ug sa opisina ni Mayor Michael Rama sugod sa Enero 2 hangtod 27 para moproseso ug mga renewal sa business permits sulod sa 30 minutos. Kana kung walay mga kakulian sa ilang mga linsensiya sa milabay nga tuig, ingon ni Villarete.

Moabli ang ‘one-stop-shop’ moabli inig abli usab sa E-Mall sa alas 9 sa buntag. Mo-undang lang kini ug panawat ug aplikasyon sa renewal ug manirado na usab ang mall. Pero kadtong anaa na sa sulod, ila kining tiwason pag-proseso, matod pa sa opisyal.

Buot pahinumduman ni Villarete ang mga negosyante nga dili maghulat ug deadline sa pag-sang-at sa ilang mga lisensiya nga I-renew para dili masilotan ug mamultahan.

Sa laing bahin, ang CTO sa dakbayan sa Mandaue mobutang usab ug ‘one-stop-shop’ diha sa Park Mall ug Pacific Mall. Mao kini ang gipahibalo ni Roger Paller, ang information officer sa siyudad. (FCR/JSME/PIA-Cebu)

2011-12-22T15:25:00.000+08:00

Duha ang positibo sa druga sa gilusad nga “Oplan Ligtas sa Krismas” sa LTO

By: Juju S. Manubag-Empuerto

CEBU CITY. Dec 21, 2011 (PIA) ---Duha ka drayber ang positibo sa druga sa gipahigayon nga drug-testing sa Land Transportation Office (LTO)-7 atol sa gilusad nga “Oplan: Ligtas na Krismas” sa Department of Transportation and Communication (DOTC)-7 karong adlawa didto sa Cebu South ug North bus terminals.

Mao kini ang gipahibalo ni LTO-7 Regional Director Raul Aguilos sa pakighinabi sa Philippine Information Agency-Cebu.

Ang duha ka drayber nga positibo sa druga kay gikuhaan sa ilang mga lisensiya ug ang resulta sa ilang ‘drug test’ ipadala sa ulohan aron kakuhaan ug kumpirmasyon nga modangat pa usab ug duha ka semana, matod pa sa hepe sa LTO.

Ug makumpirmar ang resulta nga positibo, ang lisensiya sa maong drayber i-rebokar, multahan ug P10,000 ka pesos ug dili pa kamaneho ug balik gawas lang ug moagi kini ug unom ka bulan nga pag-rehabilitasyon sa druga nga mga akredito sa kagamhan sumala ni Aguilos.

Matod pa ni Aguilos nga kaning ilang gibuhat kay ang pagsiguro sa luwas ug maayo nga pagbiyahe hilabina karong panahon sa Pasko nga daghan manakayay.

Sumala ni Aguilos nga ang ilang kalihukan kay karon lang adlawa petsa 21, ugmang adlawa petsa 22 ug sa petsa 23 sa Disyembre ra.

Mobalik sila sa maong kalihukan ngadto na Enero 2 ug 3, sunod tuig. Walay operasyon gikan Disyembre 24 hangtod Enero 1, dugang ni Aguilos.

Misulti usab ang hepe sa LTO-7 nga sa pakitambayayong sa Land Transportation Franchising Regulatory Board (LTFRB)-7 mihimo sila ug lektyur kabahin sa ‘road safety’ ug ‘road worthiness test’ ug ang tanan pasado niining mga testing ilang gihimo sa duha ka mga bus terminal.

Gipahibalo usab ni Aguilos nga ang DOTC-7, naghimo usab sa samang kalihukan diha sa mga pantalan ug airport.(FCR/JSME/PIA-Cebu)

===========

Publiko gihangyo pagdonar ug bugas, pagkaon, sinina alang sa mga biktima sa bagyo

DUMAGUETE CITY, Dec. 22 (PIA) -- Ang Department of Social Welfare and Development (DSWD) niapelar sa publiko og dugang donasyon nga bugas, pagkaon ingon man mga sinina, alang niadtong mga pamilya nga apektohan sa Bagyong Sendong nga nikuso kuso sa Negros Oriental kaadlawon niadtong Disyembre 17.

Sa siyudad sa Dumaguete ang City Social Welfare and Development Office namutos na og mga bag nga aduna’y sulod nga bugas, mga de lata, pagkaon mga sinina ug giapod apod ngadto sa 21 ka mga evacuation centers sa mga barangay sa palibot sa siyudad.

Gikataho nga sukad pa niadtong miaging gabii nagsugod ang pagpang apod-apod og mga relief goods sa mga evacuation centers sa siyudad sa Dumaguete.

Apan gikinahanglan gihapon ang dugang nga mga donasyon sa bugas, sinina ug mga gamit sa kusina tungod kay ang uban nga mga pamilya wala gayo’y nahipos nga mga sinina ug uban pa nga mga galamiton sa balay.

Ang mga donors gipahimangnuan nga mohulog sa ilang donasyon sa CSWDO subay sa Rizal Boulevard,tapad sa Women’s Center alang sa sentralisadong pagpang apod-apod sa mga relief goods.

Mga kawani gikan sa probinsyal ug rehiyonal nga buhatan sa DSWD namutos usab og mga mga relief goods sa Lamberto Macias Sports Complex aron ipang apo-apod sa mga apektadong local government units tabok sa probinsya.

Nanawagan usab si DSWD Region 7 Evelyn Macapobre og mga donasyon sama sa banig,kaldero mga plato ingon man mga kahimanan sa kusina.

Si Macapobre nahiabot sa Dumaguete sayo sa buntag Disyembre 18 uban ang mga sakyanan nga adunay karga nga mga de lata ug uban pa nga mga relief goods aron ipang apod-apod sa mga dapit sa probinsya nga apektado sa Bagyong Sendong.

Dugang mga de lata ug mga sinina ang gihatod usab sa siyudad sa Dumaguete gikan sa DSWD regional office sa Cebu City niadtong gabii sa Dec.18.

Ang regional director personal nga nisaksi sa pagpamutos ug bugas, de lata ug mga ginamit nga sinina didto sa Lamberto Macias Sports Complex.

Si Macapobre sa usa ka pagpakighinabi nagkanayon nga ang National Food Authority sa siyudad sa Dumaguete niabli sa ilang bodega niadtong Dec,18 aron paghatag og stocks sa bugas subay sa awhag sa DSWD.

Mga sundalo gikan sa Philippine Army sa Negros Oriental nitabang usab sa pagmutos sa mga relief items. (Translated into Cebuano by Amor Saludar/ PIA-CEBU)